Corpus of Electronic Texts Edition
An Irish Materia Medica (Author: Tadhg Ó Cuinn)
subsection 232
232. Rosmarinus: .i. an ros marina; teasaide tirim & na fadhar a ceim ona hugdaraibh. A blath & a duillebar imcubaigheas cum an leigis & ise as ainm don blath so dauntos37 & as uadha ainmnidhtear an lictabaire ana teit se .i. diantos & beirig a mbrigh bliadhain ana duillebar & a mblath, na luibhe so. Et ata brigh comfurtachta isin luibh so a leit a deagbalaidh & brigh discailteac osluicteac ona teasaideacht & brigh tirmuighteac cnaidhteach glantac ona tirmuidheacht. Blath na luibhe so da bearbadh ar fin & a tobhairt an aigid na sincoipisi & cardiaca & foirigh iat. An blath cetna da bearbadh ar fin & a ol & comhfurtachtaidh an incinn & foiridh teinneas an cinn. Item, bearbtar blath na luibhe so ar fin & leagar a deatac {ms folio 96b2} fon sroin & comfurtachtaigid an inchinn co mor.
p.236
Diantos & maisdix da bearbadh ar fin & bolgam do congmail isan bel co fada & foirig tuitim an t-sine seaain. Item, an luibh cetna maille re cuimin da bearbadh ar fin & a ol & foirigh tinneas an gaili & na n-inneadh. An luib cetna da bearbadh ar fin a cur te ar in imlican & foirigh stranguria & disuria & togairmidh an fuil mista & glanaidh an maclac & comhfurtachtaidh an brigh geneamhnach. Et da gnataidhis mna catrac Salernetain blath na luibhe so da bearbadh ar ola choitcinn & a cur amail pisarium sa mbanndacht da bhidis clannmar uadha & da beirid an fuil mista. Tuic leatt co comfurtachtaidtear na baill feiteacha on ros marina gurab uime sin as imcubaidh da lucht na pairilisi hi.