Corpus of Electronic Texts Edition
An Irish Materia Medica (Author: Tadhg Ó Cuinn)
subsection 231
231. Rafanos: .i. racam; teasaide tirim sa ii ceim. A prema da brisidh & a cur a finegra co ceann tri la & a bearbadh ana haitle & siucra da cur ann & a ol maille re trian uisce re loidhi & ag eirghi & fodnaigid an aigid fiabrais coididiana & terciana nota & as risan comhsuighadh so aderar oixisacra. An tsiroip cetna sin d'ol an aigid duinti na n-ae & na seilge. Duillebar na luibhe cetna da bearbadh ar fin no ar blonaig muice & a cur 'na ceirin ar druim na n-ae & scailigh a nduinti & a cruas. An ceirin cetna da cur arin imlican & icaidh sdranguria & disuria. Sug na luibhe cetna da cur bog san
p.235
cluais & foirig teinneas & buigri na cluaise & gac uili luibh diureticac asa teit a mbrigh cuirig an luibh so a mbrigh innta & a cumasc maille re premh na luibhe so. Premha na luibhe so da brisidh & a cur a finegra re fead oidce & a sitlodh arna maireach & uisce boc da cur 'na ceann & a tobairt amail sceatraigh {ms folio 96b1} & folmuigid na leanna reamra rigne bis annsa ghaili & da nitear oiximul diureticach da premhaibh na luibhe so maille re premhaibh feineil & persille & meirsi & egrime & dubhcosach & crimh muice fhiadha & bearbtar ar finegra & cuirtear mil ann & eabur mar gach ndigh simplidhe mar adubrumur. Gloss; d'antus dentar olibanum.