Corpus of Electronic Texts Edition
An Irish Materia Medica (Author: Tadhg Ó Cuinn)
subsection 208
208. Nepta: .i. neift; teasaide tirim sa iii ceim; a bearbadh ar fin & a ol & togairmigh an t-allus co huilidhi. An luibh cetna da bearbadh & a ol & a coimilt dona pulsaibh & foirig aixis. quartana. An luibh cetna da brisid 'na haenur & a cur 'na ceirin ar bel an da iscad & foirig teinneas an droma & na n-arann & tairrngidh cuigi na leanna righne {ms folio 92a1} bis annsna ballaibh sin. An
p.218
luibh cetna da bearbadh ar fin & togairmidh an fuil mista. An luibh cetna da bearbadh ar fin & a tobairt an aigid na luibri tic o fuaraideacht & ni mhedaigeann nis mo. An luibh cetna da thabairt ar fin no ar lind & foirigh greim na con confaidh. Sugh na luibhe cetna d'ol & marbaidh na peiste. An sugh cetna da cur isna cluasaibh & marbaidh na peiste isna cluasaib. Et na gnataidhid na mna torrcha an luibh so. An luibh cetna da bearbadh ar fin no ar lind & foirigh an t-asma tic o fuaraideacht & cumgacht an cleibh & duinti na seilge & teinneas an gaili & an fail. An luibh cetna da brisidh co min & a cur arna neascoidibh & foirigh a ndroc-dath & glanaidh iad.