Corpus of Electronic Texts Edition
An Irish Materia Medica (Author: Tadhg Ó Cuinn)
subsection 207
207. Nenufar: .i. blath na raibhe uisce; fuar fliuch sa dara ceim & is da premaib na luibhe cet {ms folio 91b2}na gairtear ungula cabalina. Blath na luibhe cetna do tinol a mi Iuil & a tirmughadh an inadh innfuar & beirigh a brigh da bliadhain ann. Blath na luibhe so da bearbadh ar uisce na
p.217
licoirisi & is mor fodhnus an aigid ainnteasa na mball spirudalta & is dileas an t-uisce cetna an aigid na fiabras nger mar ata terciana intribulata & quason & a cosmaile. Et fos dleaghar an aigid & na hairgi & na pulsada a coitcinne d'innladh asin uisci sin isna fiabrasaib gera. Ceirin da duillebar na luibhe cetna da cur ar druim na n-ae & coiscidh an buideocuir & ainntes na n-ae. Do tiugugad na gruaigi noch tuitis o adhbar teasaide .i. premha na luibhe so da brisidh & a cur ar folcadh & an ceann do nighi as & is fearr an luibh so isna tirtaibh teasaide na isna tirtaibh fuara & as mor fodnus siroip an blatha so isna heaslaintib gera. Et as amlaidh do-nitear hi .i. moran da blath na luibhe so da bearbadh ar uisci & a sitlodh & siucra da cur ann & bidh ana siroip. Blath na luibhe so da cur re feadh {ms folio 91b3} oidhche an uisci fuar & a cur arna maireach gan brisidh arin edan & togairmigh an codladh isna fiabrasaibh gera & coiscidh teinneas an cinn & a cur umna pulsaibh & coiscid luas an craighi.