Corpus of Electronic Texts Edition
An Irish Materia Medica (Author: Tadhg Ó Cuinn)
subsection 169
169. Leuisticus: .i. in lubhaitse teasaide tirim sa ii {ms folio 85a1} ceim & ata brigh diureticach osluigteac ann & seimhidteac. A preim & a sil is mo fodhnus chum an leigis. Ceirin don luibh so da cur ar bel an gaili & coisgidh a teinneas & a fuaraideacht. Pudur na luibhe so da bearbadh ar fin & togairmigh an fuil mista & an fual & foirigh an luibh so greim na con confaigh & a cur 'na ceirin risin creacht. A brisidh maille re heitneadhaibh na cno nGaeidhilach & a cur sa cneadh & foirigh gach uili
p.193
neimh & gabh barr lubaitse & elisdroint & meirsi & feineil deirg & liat-neanntog & camamilla beirb ar uisce milis amail fotragadh & tobair co mor da lucht na pairilise & do lucht 'ga mbid imurcaca idir feoil & leathar & bigh a brigh iiii bliadhna innti. A bearbadh ar fin & osluigidh duinti na n-ae & na seilge. Sil na luibhe so da caitim maille re pudur caineil & comfortachtaidh an dileaghadh & a tabairt a mbiadaib & a sabsaib & a n-eanbruithib da caitheamh.