Corpus of Electronic Texts Edition
An Irish Materia Medica (Author: Tadhg Ó Cuinn)
subsection 161
161. Lactuca: .i. leigeas 33; fuar fliuch {ms folio 83a4} sa ii ceim & a brisidh & a cur 'na ceirin arna ballaibh a mbia imurcraig teasbaidh & furtactachtaigid e. A cur maille re gealan uighe 'na ceirin uman edan & togairmigh an codladh isna fiabhrasaibh gera & as inann brigh & oibriugadh di & don portulaca. Et adeir Plaitiairius an luibh so da beith {ms folio 83b1} measardha & adeir gurab fuaire a sil na si fein & as mor fodhnus an luibh so mar biadh da lucht na fiabhras & a sil mar leiges & adeir Plaitiairius a hughdaras na n-uili ughdar go roib i an luibh so as measurdha dona huili luibhibh oir geinigh fuil mait & medaigid an bainne cich & in silne & is biadh imcubaidh da lucht leanna ruaigh. Et as imcubaidh i da gach uili coimpleasc teasaide om no beirbfi. A bearbadh
p.187
ar finegra & siucra da cur trit & osluigidh duinti na n-ae & na seilge. Sil na luibhe so do brisidh & gealan uighe trit & a cur 'na ceirin arna hairgibh & togairmig an codladh. An luibh so da coimilt da ballain na cich & a tabairt a mbel an leinim & togairmigh an codlad. Item, adeir Macer ceir & an luibh so da chaitim maille re finegra & comfurtachtaigid an gaili & lagaidh an bru & da caitear i co gnatac dorcaigid an radarc. A bearbadh ar uisci & an t-uisci do tobairt da ol da lucht na fiabras & togairmigh an codladh. A cur maille re hola 'na ceirin risna neascoidib & fritbuailig iat & is uime aderar lactuca {ms folio 83b2}34 ris .i. lac an bainne oir bainne geal bis innti mar adubrumuir.