Corpus of Electronic Texts Edition
An Irish Materia Medica (Author: Tadhg Ó Cuinn)
subsection 135
135. Filipindula: teasaide tirim sa treas ceim & a premha is mo fodnus cum an leigis & an inadhaib cruaighe sleibtighi fasus & bidh a brigh as ana preimh x mbliadhna re taiscidh & a tinol a ndeireadh fodmuir & ata brigh diureticach ann. An luibh so da bearbadh ar fin & brisid na cloca fuail & is tarbach an aigid stranguria & disuria
p.170
& is tarbac a clistiribh an aigid ilica & coilica. Pudur na luibhe so maille re pudur sil feinel & a ol ar fin & foirid tinnis an gaili. Pudur premh na luibhe so d'ol ar digh & foirig eipilensia amail adeir Diascordeis. Et as mor fodnas an pudur cetna an aigid duinti na n-ae & na seilge. An luibh so da cur a mailin & a bearbadh ar fin finn & a cur ar druim na n-ae & na seilge & osluigidh a nduinte & foirid iat. Pudur na luibhe so da tabairt a ndeocaibh no a mbiadhaibh & as mor fodnus an aigid cumhgaidh na hanala. An pudur cetna do cur ar smeroidibh dearga & a deathac da gabhail tri feadan sa mbel & is mor fodnus an aigid cumgaid na hanala.