Corpus of Electronic Texts Edition
An Irish Materia Medica (Author: Tadhg Ó Cuinn)
subsection 119
119. Euforbium: .i. gum crainn & is teasaide tirim sa iii ceim e & ata brigh lactach co foirtill ann & is amluigh is ferr e a ndath buidhi & folmuigid linn finn & na leanna rigni co hoireda on gaili & ona hinnibh & folmuigid na leanna cetna ona haltaib & is tarbach e an aigid stranguria coididiana do-nitear o coilera sitrina no uitilina. Is mor fodhnus an aigid na higroipisi tig o
fuaraideacht & an aigid artetica & coilica & ilica oir cnaigid in fliuchaideacht imurcach o ndentar na heaslainte
p.160
adubrumur & calmuigid cumscugadh & rathughadh na feitead. Adeir Plaitiairius gurab amlaigh dleagur an purgoid so da tobairt{ms folio 76a3} .i. gum araibium & bidellium & maisdix da cumusc mallle ris & a tobairt amlaigh sin oir da scrisfadh se na hinne da tuctaigid e co haenda. Adeir in fear cetna gurab tarbach he an aigid eipilensia & apaplexia & sefailia & ise an gum so geraideas benedicta & iaralogodion & dleaghar a tobairt maille re huisce ara mbearbtar ainis no sil feinel cum leigis asma no disnia. {ms folio 76b1} In gum cetna da cur ar smeroidib derga & a deathac da ligin sa mbel an aigid an cumgaid anala & oslaigid na fidhisi innas co ritaid na leanna righne bis ansa scaman cum a n-innarbtha & bigh a brigh ann x mbliadhna & lictabaire ana curtar e fodnuigh co mor da lucht na mi-cuimhni & litairgia. An ceann da bearradh & a nighe a fin te & ainnsein eufoirbium da coimilt de & foirigh litairgia. Item, eufoirbium da tobairt an uigh buig & foirigh an buidheacuir & duinte na n-ae & na seilge. Item, eufoirbium & maisdix & gallunach uiread da gach ni a cur isna cneadhaib & foirig gac uile linniga & salcur & feadanacht.