Corpus of Electronic Texts Edition
An Irish Materia Medica (Author: Tadhg Ó Cuinn)
subsection 92
92. Conium: .i. ros na minne mire & as fuar marbtac in ros so & da tuctar co hinmedonac marbaigh gan fuireac muna tuctar deoc d'fin te do ana diaigh & da tuctar foirig gan fuireac gan amurus & da curtar an ross so 'na ceirin arna cicib coiscid an bainne cic & tirmuigid iat. Item, gabh sug na luibhe so & bearb a duillebar fein arna brisig arin sug so & dentar ceirin cum na teneadh diadh & chum na cneadh cnaidteac & foirigh. Item, gabh sug na luibhi so do coimilt da cicib na maigdin & ni tuitid & caelaid iat. A cuimilt mar an cetna dona huirgibh & coiscigh a ndruis.
p.139
Ceirin don {ms folio 70a2} luibh so da cur arna brisid maille re blonaig muice & re tuirinn an airgead arna haltaib & foirig galar na n-alt. Item, ceirin don luibh. so 'na haenur da cur arna haltaib teasaide & foirig iat. An aigid artetica & potagra an luibh so da brisig & a fuine a plur mine eorna & a cur an uamain & a brisig ana haitli sin & a cumasc maille re finegra & re sug na luibhe so & a cur 'na ceirin arna haltaib mar in cetna & foirig gac uili guta & artetica tic o teasaideacht. An luibh so da brisidh ar fin tren & ar uisce moinge mire & a cur 'na ceirin arin fordronn & arin imlinn & foirigh ilica & coilica. Item, gabh an luibh so da lan duirn & en lan duirn da scairiola & bristear co mait & bearb ar blonaig muice amail uinnemint & foirigh an carraige. Item, gabh prem na luibhe so & bearb fo luaith & bristear co maith & curtar blonaig muice triti & plur mine cruithneachta & a cur arna hesbadhaibh & foirigh. Et adeir Plaitiairius gurub mor brigh na luibhe so ana prem & ana sil & ana ros & as di gairtear ‘erba que interfecit Socratem’ .i. an luibh {ms folio 70a3} da marb Socrates.