Corpus of Electronic Texts Edition
An Irish Materia Medica (Author: Tadhg Ó Cuinn)
subsection 91
91. Consolida minur: an noinin & ata se fuar sa ii ceim & fliuch sa iii ceim & is mor fognus an aigid na n-
easlainteadh teasaide nger mar ata terciana & causon & a cosmaile .i. gab noinin & sail cuach & dubcosach ur & portulaca & andiuia & scairiola & premha samaig & simsoca & samhadh ferna & adhann & cruac padraig & blath rosa deirg & raibe uisce comor da gach neith bristear iat &
p.138
bearb tar ar uisce firtibrad & sitoiltear co {ms folio 69b3} maith & curtar becan finegra & sug na n-uball ngrainneac ann & siucra & licoiris & an vii cuit dona neithib so & coimetar a soiteac stain & curtar an soiteac an uisce fuar 'na comnaighi & tobuir da ol don easlan mar is du. Item, gabh in luibh so & bearb ar folcadh da-nitear da duillebar na
darach & a coimilt don folt & don fesoig & claeclaid dath
na leiti. Item, adeir Auicenna an luibh so da briseadh & an t-uisce bhis 'na comnaigi a m-bualtrac bo da cur trit & a cur arna faitnib & icaid iat. Item, gabh sug na luibhe so & bainne cich mna beiris ingin & curtar en bainne de {ms folio 70a1} a poll na srona & glanaigh an incinn. Item, gabh sug na luibhe cetna & barr popin & duillebar midhaighi, na neithe so da brisig & a cumasc maille re gealan uighe & a cur 'na ceirin arna neascoidib neimhneaca ina tosac & fritbuailigh co cumachtach iat.