Corpus of Electronic Texts Edition
An Irish Materia Medica (Author: Tadhg Ó Cuinn)

subsection 70

70. Cameactis, ebulus: .i. in ualuart; teasaide tirim sa ii ceim & is inann brigh & oibriugadh do & don t-sambucus acht amain is treisi an brigh lactach isin sambucus & ata brigh

p.121

attairrngteac & innarbtha na leannann righin ann & ata brigh folmuighthi suas & sis annsa luibh so & ni dleaghar a tobairt acht in tan bus dileaghtha an t-adbar & an tan uillmightear an corp cum folmaighthi & cum flux da gabail cuigi & as amlaidh sin dleaghar gac uili sceatrac da tobairt an tan bus dileaghtha an tan bus dileaghtha in t-adbar. Is mor fognas {ms folio 65a3} an luibh so an aigidh terciana & uitilina & as mait an luib so an aigidh duinti na n-ae & na seilge & coilica & arteitica & leucafleadhmannsia & potagra & is mar so dleaghar a tabairt .i. leath lan blaisci uighe da sug na luibhe so & a urdail d'fin finn & lagaigh & folmuighidh na hadbair adubhramar.

Item, prema na luibhe so da bearbadh ar uisce & a timperail maille re h-oiximil & re siroip lacthach. Bearbtar sug na luibhe so & a hurdail da mil trit a ceili & a tabairt {ms folio 65b1} amail purgoid & fodhnaidh co maith. Item, fotragadh da denam da barr na luibhe so & a deatach da ligin fo fer na higroipise fuairi & as maith do e. Item, urbruit da duillebar na luibhe an aigid gac uili aitt & tuitmi & bualadh & innarbaidh se tinneasa & scailidh aitt & neartaigid na feithi. Item, sug na luibhe so & pudur esola & siucra da chumasc & a tabairt amail purgoid & fognuigh co mor. Item, pudur da denamh da preimh na luibhe so & sugh feineil & sug meirsi & siucra & a tabairt amail purgoid. Item, is mait an aigid atchomuill na cos & na lamh & da lucht na higroipise urbruith na luibhe so. Item, an luibh so da bruit ar a sug fein & ceirin da denam de ar potagra & ar siregra & ar arteitica.26

p.122