Corpus of Electronic Texts Edition
An Irish Materia Medica (Author: Tadhg Ó Cuinn)
subsection 68
68. Calamentum (vel calamentum maighis): .i. an cailimint et ata se teasaide tirim sa iii ceim & atait da gne air .i. gne mhor & gne bec & isi an gne mhor an neft & in ghne {ms folio 65a1} bec .i. an cailmint coitceann. Bearbhtar an cailimint ar fin no ar mulsa & togairmid an t-allus. Item, cailimint da bearbadh ar ola & a coimilt dona pulsaibh & don corp roimh aixis codidiana & foirigh & coiscidh an fiabhras. Item, an luibh so da brisid & a cur ar bel na n-isgad & foiridh
p.120
teinneas an droma & an igha fuar bhis ann & togairmigh na leanna righni o altaib in droma. Item, an luibh so da brisidh & a bearbadh ar fin no ar lind & togairmigh an fuil mista. Item, a bearbadh ar uisce & an bandacht da nighi as & doni an cetna. Item, cailimint da bearbadh ar fin no ar lind & a ol dan ti gerras madra gaithi no cu confaigh no peist neimhe & icaidh. Item, an luibh so da brisid & a coimilt ar uisce & innarbaidh luimbrisi asan broinn. Item, an luibh cetna .i. a sugh da cur isna cluasaib & marbaid na cruime bis innta & ni dleagar dona mnaib torrcha buain risin luibh so oir togairmigh in togluasacht. Item, an luibh so da brisid no da bearbadh ar fin & foirigh asma & cumgacht in cleib & duinti na n-ae & na seilge & singultus & tinnis in gaile.