Corpus of Electronic Texts Edition
An Irish Materia Medica (Author: Tadhg Ó Cuinn)
subsection 52
52. Barba filicana, plantago maigheor: .i. an cruach Padraic & ata si fuar fuar annsa cet ceim & tirim sa dara ceim & as mait da glanad & do slanugadh na cneadh an luib so da brisidh & mil da cur triti & potaiste da denam don luibh so ar eanbruiti meth caeireach no ar leamnacht & foirigh flux na bronn. Item, bristear & coimiltear ar leamnacht an luibh so & foirig an seili fola & an cosactach tic o teasaideacht. Item, ceirin don luibh
cetna da cur arin cneid & coiscidh a sileadh fola. Et an luibh cetna da brisid & a cur tri gealan uigi & foirigh
p.109
loscadh teineadh co cumhachtacht . An luibh so da brisid & olunn da chur trite & a cur ar greim na con confaigh & foirig. Item, cruach Padraic da brisidh {ms folio 61b4} & a sugh d'ol ar cedlongad & icaidh eipilensia. Sugh na luibhe cetna da congmail sa mbel & foirig an galar beil. Sugh na luibhe so da cur arin teinigh diadh & teitidh {ms folio 62a1} roimpe. Item, educh lin da cur a sugh na luibe so & a cur ar druim na n-ae & foiridh a n-att & a teinneas. Item, an aigid tinnis na fiacul & aitt a feola & a teasbaigh an luibh so da cognamh & icaidh. Item, da cosc na fola mista olund chirta da thuma a sugh na luibi & a cur sa mbanndacht. An aigid tinnis an lesa in luib so do coimilt ar uisce & foirigh. Item, an luibh so da cur fo braigid in leinimh & ni gabaid easbudha e. Item, coimiltear tri prema di ar uisce in aigid terciana & a ceathuir a fiabrus quartana roimh an aixis & icaidh gan fuireach. Item, an
aigid gac uili aitt tic o teasaideacht an luibh so da brisidh & blonaig muici da cur trid & icaidh e. An luibh so da brisid ar uisce & a tobairt da mnai bis gan slanugadh & slanuidtear co luath. Item, an luib cetna da coimilt ar finegra & a coimilt dona cosaib a haitli sibail no saetair & icaidh.