Corpus of Electronic Texts Edition
An Irish Materia Medica (Author: Tadhg Ó Cuinn)
subsection 36
36. Apum domisdicum: .i. an meirsi garrda & aderur an luib si do beit tesaide tirim sa iii ceim. Et adeir Platiairius gurub ferr a sil so chum an leigis nan luib fein & as mor fognus mar ceirin cum na sul maille re plur arain gil & sug na luibhe so trit & fodnuigh mar an cetna cum na cic. Item, gabh duillebar na luibi so {ms folio 57b3} & coimiltear da cul cinn an fir ar mbia litairgia & a sug da cur annsa sroin ag an fer cetna & furtachtaig e. Itim, an aigid aitt & tinnis beil an gaili prema meirsi da bruith ar fin finn & a ol & icaidh & meirsi ana aenur da chur ar cneadh & ni dingna urcoid da eisi. Item, sil na luibi so da bruit ar finegra & coiscid an sceatrac tic o adbur fuar
p.97
leanna finn. Item, adeir Raisis na daine ara mbia droc-{ms folio 58a1}gne a haitli easlainte meirsi omh da tobairt da ithe doib & tiadhuit ana crut fein aris. Item, an luibh cetna da brisid & a coimilt ar uisce & foirigh an fiabras coididana & adeir an fear cetna eugh meirsi & feineil oiread da gach sugh & a tobairt da ol d'fear na higroipisi & icaidh he. Item, gabh sug meirsi & amillam & gealan uighi & mil & a cumusc & a cur isna creachtaib & glanuigh & slanaighid iat. Et tuic leath co fuilit gneithe imda arin meirsi .i. aipium & ranarum .i. imas na lathfan & aipium risus .i. imas an gairi & comfurtachtaidh se an tsealg ag innarbadh leanna duibh uaithi gurub adbar dan gairi sin & aipium emaroidarum noch as imcubaig cum an daergalair. Et adeir Platiairius nach dleaghaid na mna torrcha an meirsi da gnathughadh oir sleamnaigid & bogaid na sreabainn bis a timcill an toirrcisa innas gurab cuis don toglua{ms folio 58a2}sact sin & da ngnataidhid bigh neascoide morgaithe arna leanbaibh. Et seacnad an banaltra a glacadh na a tadall ar eagla an leinimh do dul an eipilensia oir ata an ais leanmhaighe maille re moran fliuchaideachta re hanbainne brighe & re becan an teasa & le hanmainne brighe & re duintib na poireadh & as iat sin na cuisi ullmaigeas neac chum epilensia.