Corpus of Electronic Texts Edition
An Irish Materia Medica (Author: Tadhg Ó Cuinn)

subsection 24

24. Allusal, cepa: .i. da ainm {ms folio 54b1} an uinneamhain gharrda & ata se teasaide fliuch sa treas ceim & comfurtachtaid & calmaigid an gaili & an dileagadh & medaigaid an tothlugadh & innarbaid brentus na fiacal & na hanala. A brisidh & a cumasc le mil no le finegra & a cur ar greim na con confaidh co ceann an treas la & a atarrach an 3 la ar eagla na neimhe d'impod aris. Item, gabh sug uinneamhain & imain & bainne cic & a cumasc trina celi & a chur i sin cluais & foirigh gach tinneas cluaise. Item,

p.87

fos bristear an t-uinneaman & coimiltear ar uisce fuar & tobair da ol don tia o teit a urlabra & foiridh e co luath. Item, sugh uinneamain da cur bog isin sroin & glanaidh an innchinn o imurcaid leanna finn reamuir. Item, gabh sugh uinnimain & blonaig circi & a mbearbadh le ceili & foiridh an giba & na gaga. Item, bristear uinneaman & bruithtear he ar finegra & coimiltear e don inad a mbeid {ms folio 54b2} na faitneadha & foirid iat co luath. Et tuig leat mad ailt a fis an eireocaidh an t-othur gabh uinneamhan, bruith fon luait & cuir fona sroin & da di as coimeolaidh a tsroin & muna ti ni mothoca teas na boltanugh an uinneamain. Item, na huinneamain da gearrad & asa fetita mar aen riu & foiridh galar na mban re n-abar suficacio matricis & presuficacio matricis & a cur ar smeroidib dearga & a ndeathac da ligin fon maclac. Item, togairmidh gnathughadh na n-uinneamun an fuil mista co ger agna mnaibh & foiridh arna cur tri mil cailicin na sul.

p.88