Corpus of Electronic Texts Edition
An Irish Materia Medica (Author: Tadhg Ó Cuinn)
subsection 21
21. Altea, malbua, bismalua: .i. tri hanmanna an leamhaidh & aderur an luib so da beith teasaide sa ced ceim & fliuch sa ceim tanaisti & as imcubaidh
an luib so d'oirithin na cneadh & d'fas a feola. Et fos is imcubaidh i isna clisterib da lucht teneasmon & as cumachtach an luibh so an aigid leonta na mball & an aigid aitt a ngac inad a mbia. Item, prema na luibhi so do bruith & a mbrisid & blonag muice da cur tritu & foirigh gach uili att & teinneas neimh da curtar an gum darub ainm terbentina trit foiridh mar an cedha gac uili att & neimh. Item, an luibh so da bearbadh & a sugh da cur annsa maclac & glanaidh e ona salcar & furtachtaidh on tinnis. Et adeir Platiairus ceirin da denamh don luibh so an aigid thinnis & tirmaidh na feitheadh. Et an luibh so {ms folio 53b3} da bruith cona premhaibh & foiridh gac uili tinneas na mball ana urbruith
p.85
& ina ceirin. Et as maith e an aigid disinteria & a bearbadh ar fin no ar lind & furtachtaidh cuirrineacht na brond mar an cedna & as maith an aigid anntoili fearrdha e. Et adeir Avicenna gurab nor laighdigheas praiseach na luibhi so tinnis na cloichi fuail arna hol. Et leamhach da bruith ar fin no ar leamnucht & scailidh ceangal na fola bis {ms folio 54a1} a mbroinn na mban a haitli an toirrcisa. Item, bristear an luibh so & a bruith ar oluid & ar finegra & inarbaidh coin adairci na haitce & glanaidh hi ona salcur & ona fatudna. Et as maith an luibh so arna creachta tirma & a brisidh & a cumasc le mil. Item, an luibh so da brisidh & a bruith ar ola & foirigh greim na con confaidh & gac uili loscadh teneadh & uisci amail adeir Isac. Et ceirin da denamh don luibh seo & blonag muice do chur triti & foiridh cruas na seilgi & na n-ae amail adeir Platiairius & as imcubaidh ros na luibhi so da bruith ar leamnacht & furtachtaidhidh lucht na heitice amuil adeir Platiairius.