Corpus of Electronic Texts Edition
An Irish Materia Medica (Author: Tadhg Ó Cuinn)

subsection 17

17. Alapsa14, galla, pomum quersuus: .i. ubull fasas ar duilleabar na darach ata fuar tirim sa ii ceim & tirim sa treas ceim & is {ms folio 52b2} amlaid is maith iat a mbeith trom reamur gan puill innta & ata gne eli dib noch da gabtar annsan Aisia & annsan Afraic & is bec an gne hisin & ni bid puill innta & ata brigh fostoiteach coirtiteach innta araen & adeir Platiarius pudur da denum dib & a cumusc maille re finegra & le gealan ugh & a cur arin imlican & arna dubanaib & foirigh flux na bronn & flux fuail na n-arann. Et bearbtar ar uisce fertana & dentar urbruith fon timtireacht de & foirid flux disinteria & emoroighidas. Et a mbrisidh & a mbearbadh ar sisan eorna & clisteri da denam de & foirigh stranguria. Item, bearbtar an fer cetna ar finegra & ar uisce fairgi & curtar farcan ann an tan beas ac fiucadh & a cur ar bel an gaili & foirigh gac uili sceatrach tic o anmainni na brighi. Item, adeir an fear cetna e da brisidh & a bruith ar uisce fertana & a tobairt ar cadas amail pisairium isin maclocc & foirigh flux fola na mban & uair eli a bruith {ms folio 52b3} ar sug cruaichi Padraig & a tobairt

p.82

amail adubrumar & do-ni mar in cetna. Item, pudur da denam dib & a cumusc le sugh losa an sparain & a fascadh tri edach isin sroin & icaidh flux fola na srona. Item, dentar pudur de & curtar gealan uighe trit & a cur na ceirin arna hairgib & foirigh flux fola na srona. Item, dentar pudur de & a cur isna creachtaibh & cneasaigidh na creachta co maith. Item, madh all lit an folt da dubadh gab chugad an galla na beit puill ann {ms folio 53a1} & beas trom imlan & bearb ar ola iat no co n-ataid attaid & no gu remraigid annsan ola & a tirmugad asa haitli in edaigaib lin & pudur min da denamh dibh maille re croicinn no le duilleabar na cno franccach & cumuisc le huisce fertana an pudur so & a mbearbadh d'entaib & an folt no an fhesoc da nighi as asa haitli & bid dub da eisi & nigtear an folt da eisi a huisce bog ar eagla an croicinn do milleadh.