Corpus of Electronic Texts Edition
An Irish Materia Medica (Author: Tadhg Ó Cuinn)

subsection 12

12. Agaricus, fungus: .i. da ainm na h-agairge & ata si teasaide tirim annsa cet ceim ase is agairg ann .i. farcan crainn darub ainm abietis & a crich na h-Innia fasas {ms folio 51a2} & ataid da gne air .i. gne mascalta & gne ementa. Et isi in gne ementa as mo foghnas cum an leigis & is mar so athaintear i .i. an tan bristear an gne ementa an a brataibh sleamhna & ni mar sin an tan bristear an gne mascalta ach beith an a bruscar mín & adeir Ebe Mesue gurab i an agairc as gili & is usa da brisid as fearr ann & folmuigid si linn finn co hoireada & linn dubh co tanaiste & gurub airi sin as mor foghnus an aigid terciana an tan tic o coilera sitrina & uitiliana & fodnuidh an

p.76

aigid an coididiana & an quartana do-nitear o linn ruagh loisci & aderur fos co fognann an aigid coilica & ilica & an aigid gach uili tindis tic o leannaib righne isin corp leath astig. Et oslaigidh duinte na n-ae & na seilgi & na n-arann amail adeir Ebe Mesue. Et gnathaigtear an agairg da tobairt comsuigigte a ndeocaib & a tretaib & a clairetaib & a leigesaib lactacha & Uair ann bearbtar an agairg ar fin da gerugad na leiges lactacha & ni bec en dragma di cum geraithi na {ms folio 51a3} leiges eli. Et uair ann bearbmaid hi maille re croicinn pfrem na raidleoige & le sail cuaich & deoch d'ol de roimh aixis fiabrasa coididiana & foiridh an fiabhras isin gan fuireach. Et da-beir drong eli ℥ di maille re tri ℥ da sugh feinel & foirid an fiabras adubrumar & a pudur da cumusc maille re mil & le hola & a tobairt amuil clisteri & foiridh stranguirria & disuiria.

Item, gabh egrim Gaedilach & bruith ar fin & cuir pudur agairge ar an fin hisin & foiridh gach uili fual-galar & tinneas bis isin tslait ferrdha & adeir Ebe Mesue co tairrnginn a pudur so na cnama bristi {ms folio 51b1} asna cneadhaib & co n-innarbann an droch-feoil & co tobair feoil maith inntu & co leigesinn gach uili linnida & feadantacht teit a mi-cenel. Item, pudur min da denam de & a timperail le sugh clamain lin & le hola & a cur isin timtireacht ar cadas min & foiridh emeroidhis & gach uili gne don daergalar. Item, dentur pudur min de & curtar salann trit & fuilidtear arin ngne luibri re n-abur moirfia arin inadh a mbia & croithtear an

p.77

pudur air & icaidh. Item, gabh ℥ d'agairc & ℥ co leith da scinannti & dragma da ʒ da castorium & leath-℥ do do sene & bristear co min & dentar pillidi dib & le sugh aipsinnte & feineil & icaidh an tinneas cinn eirghis on gaili o cin leanna finn.