Corpus of Electronic Texts Edition
An Irish Materia Medica (Author: Tadhg Ó Cuinn)
subsection 11
11. Affodillus, centum capita, aillium agreiste: .i. tri hanmanna an creamha & adeir Platiairius as mo as imcuibe dhi a premha so cum an leigis na a duilleabar & as mo foghnus a hur na a crin & ata brigh togairmthi an fuail{ms folio 50b3} & glanta na n-arann innte & ata an luib so teasaide tirim sa ii ceim & sugh na luibhi so da cur ar loscadh teneadh no uisce & icaidh & an luibh so da chognamh & foiridh an galar beil.
Item, gabh prem rusc ualauairt & a urdail eli da prem rusc truim & a mbearbadh ar sugh na luibhi so & foirid an igroipis re n-abur leucafleadmainnsia & a sugh da cur isna foibertaibh & foiridh galar na sul. Item, adeir Plaitiairius nach imcubaidh ach a blath amhain cum an leigis & fetar so da taisgi go ceann da bliadain an a brigh & an a hoibriugad & ata brigh
p.75
discailteach ann co mor & adeir an fear cetna {ms folio 51a1} in fin no an t-uisce ara mbearbtar an luib so da tobairt da ol & glanaidh na baill spiradalta o linn finn reamur & adeir fos da mbia tinneas no gaethamhlacht annsa gaili no isna hinnibh o fuardacht no o duintibh na selgi & na n-ae & sin da tiacht o adbar fuar an luibh adubrumar da bearbadh ar fin & a tobairt da ol & icaidh. Item, an luibh cetna da bearbadh ar uisce saillti & a tobairt da ol an aigid stranguiria & disuria & an luibh cetna da brisid & ceirin da denamh de an aigid tinnis an gaili tic o fuaraideacht & o gaetamhlacht & fognaidh a cathamh an aigid coilica passio. Item, an luib cetna da bruith ar uisce & fotragadh da denamh de & a deatach da ligin fuithi & glanaidh an maclac & togairmid an fuil mista agna mnaib.