Corpus of Electronic Texts Edition
An Irish Materia Medica (Author: Tadhg Ó Cuinn)
subsection 10
10. Accride, bancia, pastinaca: .i. tri hanmanna an meacain righ & adearur an luib so da beith teasaide a medon an ii ceim & fliuch a tosach an ii ceim & adeir Plaitiairius gurab mo imcubhuigheas an luibh da leith an bidh na da leith an leigis & tuismidtear fuil remur uaithi & medaigid co mor an toil & an sperma & fodnaigh prema na luibhi so da catatamh omh da lucht leanna duibh {ms folio 50b2} & cuiridh a fliuchaideacht iat & medaighi a coimpert &
p.74
adeir Maidcer an luibh so da bearbad ar fin an aigid tinneasa an gaili & na n-ae & na seilgi & na n-arann & adeir fos prema na luibhi so da bruith ar leamnacht & fognaidh an aigid asma & disnia & ortomia & adeir fos premh na luibhi so da cur fo braighid an lucht aga mbia att na n-uirgibh & foiridh a n-att & a tinneas & adeir fos gibe ga mbia fo braighid nach urcoidigheann neimh dho. Et adeir fos prema na luibhi so da cur fona fiaclaibh & foiridh a tinneas & a tobairt dona mnaib aga mbia toirrcis marb & innarbaigh e. Et adeir Plaitiairius co medaighinn an luib so an dileaghadh & co n-oilind an corp co mor & adeir co foghnann co mor da lucht stranguria & disuiria.