Corpus of Electronic Texts Edition
An Irish Materia Medica (Author: Tadhg Ó Cuinn)
subsection 5
{ms folio 48b3}5. Acalife, urtica: .i. da ainm na neanntoigi & ata an luib so tirim sa treas ceim & teasaide sa iiii, & adeir Avicenna gurab inmolta an luib so an aigid fuardachta an scamain & an aigid na sean-cosachtaidhi bis re fada ar
p.68
neach & is imcubaid an aigid ait & tinnis na bronn ros neannta da bruith ar mil & a sitlodh tri etach & lan leighi da thobairt da ol de ar cet longadh. Et fognaid mar an cetna an luibh fein da brisid & a c{ms folio 49a1}oimilt ar fin & a tobairt da ol amhuil digh. Item, an luib cetna da brisidh & a sugh da buain aisdi & /an sug sin da cur annsna cneadaib salcha morgaithe no a ngreim na con confaidh no an aillsi & icaidh. Item, an luib so da brisidh maille re salann co min & a chur amuil ceirin arna heasbadaibh & foirigh & ata brigh tirmaidteac & glantach annsa luibh so & ata brigh fasta feola nua isna cneadaib innte & fognaidh an luib so an aigid cruas & ait na seilgi & a cur amail ceirin. Et adeir Gillibertinus an luibh so da briseadh co min & a cumasc maille re finegra & a cur amuil ceirin fona haltaib & foirigh an potagra & an t-artetica tig o fuaraideacht. Et sil na luibi so da brisidh & a bruith arin digh darub ainm mulsa & togairmigh an fuil mista & an fual co cumachtach. Et aseadh as mulsa ann da reir Avicenna .i. viii rainn d'fin finn & an ix-adh rann d'uisce fir-tibrad & in x-madh rann da mil glain & a cumasc & a mbearbadh trina ceili & a sitlodh & isi sin {ms folio 49a2} an deoch darub ainm mulsa da reir Avicenna.
Item, as maith an luibh so da bearbadh ar fin & an fin so da congbail co fada annsa bel & as maith an aigid tuitim & reamhadas an t-sine thseaain. Et adeir Platiarius an luib so da bearbadh ar fin & a tobairt an aigid an galair buighi & íce & fos as imcubaidh an aigid coilica passio &
p.69
togairmidh an luibh so an druis da caitear amail as du.
Et adeir Platiarius co coiscinn an luibh so arna brisidh flux fola na cneadh & as imcubaidh i cum leighis na pleurisisi & da ghlanadh an cleib & an maclaig o gach uili tsalcur bis ionta.