Corpus of Electronic Texts Edition
An Irish Materia Medica (Author: Tadhg Ó Cuinn)
subsection 4
{ms folio 48b1} 4. Abrotanum, camphorata, .i. da ainm Laidianta an t-suramuint & ata an luib so da reir Platiarius teasaide sa dara & tirim annsa cet ceim. A bearbad ar uisce & foiridh cumgacht an cleibh & an cosachtach tic o adbar fuar.
Item, a brisid & a bruith ar fin & a tobuirt amail digh & togairmidh an fual & an fuil mista. Item, an luib so da bruith ar fin & foghnaidh co mor an agaid tinnis na n-arann & na n-innedh darub ainm lion & colon & an aigid fuardachta na feitheadh ana digh & ana ceirin. Item, as imcubaigh an luibh so an aigid gach uili neimhe leath amuit & leat astidh. Item, an luibh cetna da brisidh & a coimilt ar uisce & a tobairt roim aixis fiabhrasa coididiana & quartana & icaidh. Item, uinnemint da denam (am) dan luibh so & da blonaig muice & d'ola coitcinn & a
p.67
coimilt d'altaib an droma & toirmiscidh aixis na fiabhras adubrumar. Item, an luibh cetna da briseadh & a coimilt ar leamnacht bo & a ol ar cet longadh & marbaidh gach uili peist bhis an eachaib & a ndamaib. Item, bristear {ms folio 48b2} an luibh so & cumasctar le blonaig muice & curtar mar ceirin ar an dealg bis a laimh no a cois & tairrngidh an dealg quigi. Item, an luibh so da bruit ar fin & a briseadh co min & blonaig muice da cur trite & foirigh loiniga gan amarus. Et adeir Platiarius an luibh so da bruith ar fin & a tobairt da ol & innarbaigh an toirrceas marb & togairmidh an fuil mista. Item, foiridh neascoid an maclaig & na banntachta & furtachtaidh co mor sdranguria & gac uili tindeas bis isin maclac & na leanna morgaithi imdaigheas and, innarbtar iat o catamh na luibhi so mar as du. Item, dentar pudur don luibh so & curtar maille re sean-ola ar an maili & dabeir an finnfad gan fuireach. Item, bristear an luib so & bointear sugh aiste & tumtar edach nua lin annsa sugh sin & curtar arna pulsaib & foirigh rigor fiabrais antribulata. Item, ceirin don luibh so da chur arin mball a mbia fuil o bualadh idir fheoil & leatar & foirigh e.