Eg 104v ( LM Bk. 4, Ch. 1): ‘Is inntuicthi timchill an adhbhair so co fuilid da slighi a cois premhe na tengadh .i. slighi an bidh & slighi na hanala. Slighi na hanala vero .i. trascia arteria & epiglotum a ceand. Slighi in bidh vero is ainm di meri no ysophagus. An tslighi ata co hinmedonach idir an da slighi sin is di gairtear guttur. Et ata ni co huachtarach ar in da slighi sin adubhramur ar tus & ise is ainm do uula .i. an sine seaain & is amlaidh bis {edition page 864} amail do beith mer ar fheadan. Et atait da ball feolmara eli a leanmuin do bun na tengadh re n-abar ameghdule & is ime aderar ameghdule ru oir is inand ameghdale & almont oir is a cosmaileas almont bid. Leith aithche vero an muinil re n-abar gula isi is slighi dilis don anail, leith cuil vero an muinil re n-abar ceruix is trit gabhus in tslighi re n-abar meri... Squinancia vero is and cruithightear hi a laccertibh in boill re n-abar gutur & isin da slighi sin an muinil. Et ecsamailtear gneithi squinancia fo examhlacht an inaidh sin. An cet gne do shquinancia is amhlaidh bis maille re hatt & re deirgi & rena bel do beith oscailti. An .2. gne ni faictear hi co follus muna cumgaidhtear arin tengaidh co mor. An .3. gne di ni faictear hi ar en cor oir bidh an neascoid in tan sin co folaightheach isna slighthibh sin. An .4. gne di an tan is follus in t-at co hinmedonach isin gutur & co foirimillach isin braghaid... Da roibh dearg atmar te maille re teinneas & re puls lan is o fuil deirg do-nitear & da roibh a ndath buidi maille re cnamh & re bruidernach is o linn ruagh do-nitear. Da roibh atmar geal bog maille re becan teinnis & moran selidhi isin bel is o linn finn do-nitear. Da roibh cruaidh & a beith a ndath uaine & an galar righin martanac is o linn dubh do-nitear. Et mad o ball eli tic adbar an squinancia bith an ball o tic maille re heire & re tromaidheacht do sir. Et madh ona heaslaintibh eli no {edition page 865} o rem-cuisibh tic is follus sin do reir na neithe tainic roimpi & o scelaibh an othair. Ac so comarthadha an squinancia bis co folaightheach co hinmedonach nach faictear hi .i. cumgach anala & in tan ibhis uisce a beith ac impodh cum na srona maille re torainn & suile dearga & in tenga do beith teann & guth cuileinn & muinel teann. Is iat so comarthadha follusa na squinancia .i. cumgach anala & teinneas an beil oslaicthi.’