Eg 39v–40r: ‘Is eadh is morphea and truailliugad baltnaigtheach an croicinn. Dleaghar a fhis gach ni is cuis don lubra gurob cuis do morphea e & is uime sin an ni is lubra isan feoil ise is morphea isin croicinn. Maseadh dleaghar a fis co fuil cosmaileas ac morphea ris an lubra oir mar tseachranaigeas an brigh coimedtheach isan lubra do-ni a morphea, gidheadh ata deichfir eturra oir is annsa feoil bis an lubra & isan croicinn bis morphea. Et ata cosmaileas fos ac morphea re hictericia oir ata an croicinn arna salcadh innta araon, gidheadh ata deichfir eturra mar ata an truailliugad baltnaigtheach a rann don corp a morphea & a rann eli gan a beith. An ictericia vero ata truailliugad an croicinn uilidhe no a ngar do beith uilidhe. An .2. deichfir oir ni bi seachran na brighi cosmailighthi an ictericia & bidh a morphea; maseadh fagtar mar congluid curob eadh is morphea and seachran na brighi cosmailighthi isan croicinn. Et dleaghar a fis timcill an adhbair so nach cuirid na hughdair a coitchinne acht .2. gne ar morphea .i. gne geal & gne dubh... da mbia o fuil deirg & a beith isin agaidh aderur gutta rosacea & da mbia sa cuid eli don corp aderur rubores in tan sin & da mbia an salchur so o linn ruagh aderur impetigo ris... mar aderur sa .3. {edition page 824} leabhar De Morbo, is arna redaibh ata an ealadha leighis & ni harna briatruibh & is uime sin nach fuil mu brigh isin n-uimhir no isna hanmannaibh acht co tuictear na reda; maseadh bith 'na funndamint againn .4. gnethi do beith ar morphea .i. gne o fuil deirg loiscthi & gne o linn ruagh loiscthi & gne o linn finn tshaillti & gne eli o linn finn loiscthi. Da mbia dath an coirp dearg riabhach baltnaigtheach is o linn ruagh beas & da mbe geal baltnaigtheach is o linn finn & is oirdearc an gne so & da mbe a ndath dubh is o linn dubh tic & is ro-oirrdearc an gne so fos; maseadh na bith coinntinn fana hanmannaibh acht co tuicim na reda.’