Caínti .i. óní is cainis cú, ar cend con for caínti ag amhustraigh. Unde Crithenbhél Cainti.
Crithinbél [.i. crithirbél] .i. bél na chrither .i. ara neimhnighe & ara theintemhlacht na m-bríathar úadh, ar is nemhnech bríathra in dána iter. Nó Cridenbél .i. a cridhe ina bhél .i. a rún in a bhélu, ar ní gheibed som iter for rún día cluinedh. Nó Critherbhél .i. bél na crithir, ar is é cétchaínti dobhaídh ríghchainnell ó tengaid artús é.