Corpus of Electronic Texts Edition

Cóir Anmann (Author: Unknown)

entry 144

144

Aerghialla .i. daérghialla .i. Cinél [n]-Eóghain meic Néill ruscuir fo daérchís iát ó chath Beithichaim amach. Nó Aerghialla .i. sáerghialla, ar bat sáer iát sech cach áen aile, uair ní dhligh rí Temhra agrai no cengal [forru na] for a n-giallaibh-seom sech cach n-giall aile a n-Erinn, dí andebairt in fili:

1. 1] Nói n-gheill do rí[g] Fódla ar fecht
   2] do dheoín rí[g] Airghíall aenfecht,
   3] i l-laímh rí Temhra na tor
   4] gin agrai ocus gin cheanghol.

Airghialla tra .i. ar ghialla .i. ar ghiallaibh dóibh ó rígh Temhra & géill uatha som do rí[gh] Teamhra. Is de sin isrubhairt in fili:

p.352

1. 1] Géill ar ghiallaibh do rí Airghiall
   2] ó rí Teamhra tre nert níadh,
   3] ara n-uaislecht, ara mordhacht,
   4] ara crodhacht a[c] cur ghlíadh.