Item Cormac ad Carpre.
- Ní bága fri ríg,
ní chomrís fri báeth,
ní chomthéis fri díbergach,
5] ní chomthana fri échtaid,
ní cria di secht mbáethaib file la Féne,
.i. di mnái, di chimbid, di mesc, di drúth, di dásachtach, di ardd,
di arusc,
nír imthige fri roth ná rout ná roilbe ná romur ná
10] báegul ná ga,
ní dlútha écnach,
ní ba thibre dála,
ní ba bronach cuirmthige,
ní ba dermatach dála,
15] ní ba dochoisc,
ní ba imresnaid fír,
ní ba aichneich for gói,
ní ba foss foglaide,
ní ba chond ugra,
20] ní ba muine debtha,
ní ois do beólu do chách,
ní thairngire ná dotbé,
ní ba choibchech ar ná ba fíachach,
ní ba imgonaid ar ná ba mélachtnach,
25] ní ba chomramach ar ná ba miscnech,
ní ba imresnaid ar ná ba cennscoilte,
ní ba garg ar ná ba dobláith,
ní ba ugrach ar ná ba aitchennach,
ní ba éitir ar ná ba éslesach,
30] ní ba cotut ar ná ba dothcherna,
ní ba rogartaid ar ná ba aithbe,
ní ba lesc ar ná ba meirb,
ní ba roescaid ar ná ba dáiscuir,
ní ba debthach ar ná ba scarthach,
35] ní ba ráth ar neoch ar ná ba eirse do chomaithech.