Corpus of Electronic Texts Edition

The instructions of King Cormac Mac Airt: Tecosca Cormaic (Author: Unknown)

paragraph 16

‘A húi Chuind, a Chormaic,’ ol Carpre, ‘cia etargén mná?’ ‘Ní hansa,’ ol Cormac. ‘Nosnetargén & nísnetargléim.’

1. Serba sirgnáse,
   mórda tathigthe,
   5] drútha follaigthi,
   báetha comairle,
   santacha tormaig,
   aigde aisnéise,
   debthaige frecnairce,
   10] míanacha léicthe,
   santacha tabarta,
   freslige roscéla,
   cailte dígbála,
   feidle miscne,
   15] dermatcha seirce,
   ítfaide toile,
   deithite cairddine,
   cundamna écnaig,
   écundla airechta,
   20] airrechtga ugrai,
   étairise rúne,
   rudracha táithe,
   garechtga eóit,
   immaicse taithlig,

   ---

   p.30

   
   25] tórachtcha báise,
   brassa airnadma,
   airlama forgill,
   foille foichlige,
   sóera ainme,
   30] essóera ícce,
   consuidet nád comraicet,
   ro mairnet nád aincet,
   úallcha tochmairc,
   écnaig míadamla,
   35] fóille foimrime,
   táithe abrais,
   rigne célide,
   diumsacha dagdóine,
   doirche gusmara,
   40] dermatcha coisc,
   cumnige debtha,
   fanna immargaile,
   inire debtha,
   díarithe lítha,
   45] bróncha cuirmthige,
   comnarta imresna,
   énairte fedma,
   todiúre ciúil,
   étradcha lige,
   50] labra écundla,
   tuillmecha augrai,
   cessachtaige biid,
   amairsi erlabra,
   eitche trebaire,
   55] tailce erlabra,
   ána athise,

   ---

   p.32

   airrechtga fresligi,
   frithbertacha cóemnai,
   cuimnige díchoemnai,
   60] dimbeóda tinóil,
   cétludcha báise,
   béoda tingill,
   tomtencha uilc,
   santacha dála,
   65] duabaise tairirid,
   tromda coblige,
   bodra forcetail,
   dalla dagairle,
   dochéille sochaide,
   70] míancha blassachta,
   mina tairberta,
   terca tidnacuil,
   tláithe timgaire,
   aidble irnaidi,
   75] ainble céilidi,
   imda labartha,
   fossaide im thoil,
   cumge airberta,
   eólaige rebraid,
   80] aneólaige réire,
   rescacha rurit,
   dulbaire torbai,
   sulbaire espai,
   snímcha cendmaisse,
   85] canait nád comaillit,
   triallait nád forbait,
   forcomat nád comraicet,
   rodíallat nád astat,
   adgellat nád firat,

   ---

   p.34

   
   90] dorairngerat nád chomallat,
   conrannat nád fúaslaigit,
   rocollet nád íccat,
   forfodlat nád tinólat,
   ronertat nád dernat,
   95] adsegat nád táircet,
   conscarat nád rothinólat,
   rorenat nád toibget,
   robronnat nád rothrebat,
   fó cach tan tene,
   100] fó cách náchasríaraig,
   a n-úaman amail tenid,
   a n-ecla mar fiadmíla,
   elca míla mná,
   maith fidbad cech ráithe,
   105] mairg rodafóinblig,
   ferr a flescad a fóenblegon,
   ferr a sroigled a subugud,
   ferr a túargain a táltugud,
   ferr a mbúalad a mbuidechas,
   110] ferr a foimtiu a tairisi,
   ferr a tróethad a turgorud,
   ferr a ndinge a ngrádugud,

1. 115] At tonna notbáidet,
   at tene notloisc,
   at airm defáebracha notchloidmet,
   at legaim ar lenamain,
   at nathracha ar túaichli,
   120] at dorcha i soillsi,
   at olca etir maithi,
   at messa etir olcu.

p.36