- Cennus Ghaoidheal do chlann Cholla, coir a fhógra
síad arís na gcathibh cétna, flatha fodla.- Cennus Eirenn & Albuin an fhuinn ghríanaigh
ata ag an dréim fhuilidh fhaobhraigh cuiridh cliaruidh.- Fuair cennus na haicme uile, Eoin a h-Íle
fuair Alasdair flath na feile, rath na ríghe.- Domnall Eoin & da Aongus ma nfhial fháoilidh
cethrar do bhen riar do righibh, sdar ghiall Gaoidheal.- Domnall is Ragnall don ríoghradh riamh nar tughadh
Somuirle nar mheall amoladh cenn na ccuradh.- Cethrar ó Shomairle Shúl ghorm, suas go Suibhne
ceathrar sin nach foill ninbhe, coir agcumhne.- Seisior o Suimne riomh rathmar, go rígh Colla
fion aca fa bhruach banna, a cuachuibh corra.- Da nairfinn an ttainig uime, dúaslibh Ghaoidheal
beim ar enghluin úadh go hadhaimh ni fuair aoinfher.
- Ag so tres do ginealach Gháoidheal mar do ghellus
an dremsa ris nar chóir coimes, sdar choir cennus.
[Follows in R. B. the prose poem describing the Arming and Army of John, 4th Earl of Ross. See Elegies and Eulogies].
Aois ar tigerna 1473 an bliadhna fuair Giollasbuig mac Alasdair a h-Íle bás & do hadhnaigadh a chorp an Ros Mhaircni .i. brathair d'Eoin a h-Íle mac Alasduir a h-Íle & athair Alasdair mic Ghiollaasbuig do mharbhadh le Mc Cenain a n-Orbhannsáigh Colbhannsaigh & inghen Mic Duibhsithe a Lochabar máthair an Ghiolla Esbuigsi mic Alusdair a h-Íle.
Aois an tigherna 1437 an bliaghuin do marbhadh Ri Alban .i. an cét ri Sémus ambaile Phert go fealltach le derbhrathair a athar .i. morbhair Athfall.
Sa náimsir cétna tésda Aonghus esbuig Innsi Gall .i. mac Domhnuill a h-Íle mic Eoin mic Aonghuis Óig ro hadhnaicadh a chorp lan uasal le bhachaill & le chuladh esbag san chruisde as ttaobh des don chor uidh mhóir amhuil do thogh fein dho re na bheó.
Do bhi mac oile ag Domhnall a h-Ile na manach & is re na linn do bronnadh Baile an Mhanuidh a n-Uibhisd do n-eagluis Anno Domini 1440.
San bliaguisi teasta Máire Leislí Bánmhorbhair Rois & Bainthigherna Innsi Gall .i. ben phósta Domhnaill a h-Ile.
Tugas 48 cuntas duit sgach ní is ríasdanas duit fhios do bheith agad do chraobhsgaoladh Chloinn na c-Colladh & chloinne Domhnaill go bás Dhomhnuill Duibh a n-Droichet Átha .i. an linne dírech do shealbhaigh Innsi Gall & Ros & Gairbh Chriocha na h-Alban.
Ase an Domnallsa mac Aonghuis do mharbhadh ann Inbhernis le na chlairseoir fein (mac Í Chairbre) mac Eoin a h-Íle mic Alasdair mic Domhnaill a h-Íle mic Eóin a h-Íle mic Aonguis Óig, & ni bfuil fios agamsa cia da chinedh no da chairdibh is oighre dlesdanach air, acht an cuiger macsa Eoin mic Aonghuis Óig do cur sios duit .i. Raghnall & Gothfroigh, dís mac inghine mic Dubhghuill Lagharna & Domnall & Eoin mór & Alasdair carrach triuir mac Mairghréide Sdiurord Iarrla Fif & goibhir(n)eir no ri Alban.
Sliocht Ragnuill tigerna chloinne Ragnuill .i. tigh an Oilen Tirim & tigerna Ghlinne Garadh.
Ni fhuil sliocht ar Ghothfri acht began do dhaonibh bocht ata san chenn túath d'Uibhisd.
Sliocht Domhnuill a h-Íle cét mhac Mairghréide Sdiubhord Alasdar a h-Íle Iarrla Rois & morbhar na
n-Oilen, do phós an t-Alasduirsa Mairgréd Lívisdon ingen Iarrla
Clann oile ag Alasdair .i. Huisdiun, inghen Ghillepadraig Rúaigh mic Ruaighri mic an Aba Uaine mic Iarrla Rois dona Rosachaibh a shloinneadh & trían Leoghuis abhetha & fearuinn oile ar tír mór & is é do marbhadh sna rannuibh Gallolach an gcuidecht mic Domnuill .i. Domhnall a h-Ile oir cethrar do chuadar amach as anárm roimh chuidechta no phártuigh do tslúagh do chúaidh leó .i. Tormód Mac Leoid & Torcuill a bhrathair Lochluinn mac Giolla Mhaoil Giolla Pádruig mac Ruaighri do marbhadh Giolla Padruig mac Ruaighri & Lochluinn mac Giolla Maoil & tainic Tormód & Torcuill as an rúaig slán. Anno Domini
Ase an t-Uisdiun-sa mac Alasduir do creach Arcum & Uilliam Mac Leoid na h-Earadh & ogmhuigh Innsi Gall na fochuir ar an siubhal sin do rinne h-Uisdiuin Domhnall Gallach mac h-Uisdiuin re hingin chruineir ghall & do Ghuinnechibh a sloinneadh clann mhaith oile ag h-Uisdiuin .i. Domhnall h-Earach mac h-Uisdiuin & inghen Mic Leoid na h-Earadh do mhathair aige & Eóin mac h-Uistiuin & ingen Mic Ceaáin Aird na Murchann do mhathair aige & ni roib sliocht ar a n-Eoin sin & dobi seal na tigherna Giolla Asbuig mac h-Uisdiuin & mic oile nach airfighter ann so. Domhnall Gruamach mac Domhnuill Ghalluidh & Domhnall Gorm mac Domnuill Gruamich & Catriana inghen Alasdair mic Ailin tigerna Chloinni Raghnaill do mhathair aige & is ar a sliocht ata an tigernas fós.
Giolla Easbuig mc Alasdair a hile inghen mic Duibhshithe a lochabar a mhathair & Alasdair mac Giollaeasbuig do chuaidh an sealbhadh iarrlacht rois & Domhnall amhac sin fuair se bás gan sliocht. Eoin Mór mc Eoin mic Aonghuis Óig .i. tanaisde mic Domnuill do phós se Máire Bíséd & is lé tainic na seacht túaithe glinneach go cloinn Domhnuill.
Alasduir Carrach an treas mac. Do phós sé innghen mhorbhair Leamhna & ni rug si clann dho Aonghus mc alusdair is í fa mathair dho inghen mhic Duibh shleibhe & ni roibhe si posda aige Alasdair mc Aonghuis o fuil sliocht alasduir mic Aonguis san bhraighe an Loch habar ag sin agad sliocht an chethra mac sin Eoin mhic Aonghuis Óig.
[Follows elegy on Sir Norman Macleod, by Niall Mc Vurich, elegy on James Macdonald, and poem on Exile of Ranald. See Elegies,&c.]