Find and the Phantoms

{MS page 206b}

1] Oenach indiu luid in rí,
2] Oenach Life cona li,
3] aebind do cech-oen téit and,
4] ni hinund is Guaire dall.
5] Ní Guaire dall gairthea dím
6] lá lodmar fo gairm in ríg
7] co tech Fiachu fairged gail,
8] cosin ráith os Badammair.
9] Oenach Clochair romór Find
10] is fianna Fail is cech dind;
11] ramorsat Mumnig din maig
12] ocus Fiachu mac Eogain.
13] Tucait eich na fían rofess
14] is eich Mumnech 'sin morthres,
15] rofhersat tri graffne glana
16] for faichthe maic Maireda.
17] Ech dub re Díl mac Dá-chrech
18] bái in cach cluchi rofer²,
19] cusin carraic uas Loch Gair
20] ruc trí lanbuada ind oenaig.
21] Cuinchis Fiachu in n-ech iarsain
22] ar in ríg, ara shenathair,
23] gellais cét dó do cech crud
24] dia tabairt i tuarastul.
25] Roráid in drúi and iarsain
26] aithesc maith ra mac Eogain: —
27] "ber mo bennacht, ber inn-ech
28] ocus tidnaic rit aenech."

29] "Ashiút duitsiu int-ech dub dian",
30] ar Fiachu ri flaith na fían,
31] "ashiut mo charpat co mblaid
32] is ashiút ech dot araid."
33] Asiút claideb is gell cét,
34] asiut sciath a tirib Gréc,
35] asiut sleg co mbricht neme,
36] ocus m'idnu airgdide.
37] Asiút tri coin, caem a ndath,
38] Feirne is Derchaem is Dualath,
39] con a-muincib óir buidi
40] co slabradaib findruini.
41] Mad ferr duit na beith cen ní,
42] a maic Cumaill, a ardrí,
43] na digis can ascid ass,
44] a fhlaith na fían firamnas!"
45] Atraacht Find suas arsain:
46] buidech é do mac Eogain:
47] bendachais cach da cheli:
48] ba curata a coméirge.
49] Iarsain luid Find roínn ar sét
50] lodsam leis tri fichit cét
51] co Cachér, co Clúain da loch,
52] lodsam uile assinn oenoch.
53] Trí lá is tri aidche ba leith
54] bámmar uile i tig Cachir,
55] cen esbaid lenna na bíd
56] ar na sluagaib 'mán ardrig.
57] Coica falach tucad dó,
58] cóica ech is cóica bó,
59] dorat Find fiach a lenna
60] do Chachiur mac Cairella.

61] Luid Find for Luachair iarsain
62] cosin traig ac Berramain:
63] anais Find co fiannaib Fáil
64] os or in locha lindbáin.
65] Luid Find d'imlúad a eich duib
66] forsin tráig oc Berramuin,
67] misse ocus Cailte tri báis
68] raithmít ris ra bothogáis.
69] Immar atchondairc in rí,
70] búalid a ech co Tráig Lí,
71] Tráig Lí col-Leirgg Daim Glaiss,
72] dar Fraechmag is dar Findnais.
73] Dar Mag da Éo, dar Móin Cend,
74] co Sen-ibar, dar Sen-glend,
75] co hInber Flesci finni,
76] co colomnaib Crohinni.
77] Dar Sruth Muinne, dar Moin Cét,
78] dar Inber Lemna, ní bréc,
79] otá Lemain co Loch Léin,
80] etir réid ocus amréid.
81] Cid sinni nirsar malla,
82] ropsat lúatha ar lémmenna,
83] fer úan da chlí, fer da deis,
84] ni fhil fiad arna bermís.
85] Lam ri Fleisc sech Fhid in Chairn,
86] sech Mungairit meic Scáil Bailb,
87] nocho ragaib Find ra ech
88] cosin cnocc diarb ainm Bairnech.

89] Mar rochuammar 'sin cnocc
90] sinni ba toisciu 'cá thocht,
91] cid sinni ba taisciu and
92] ech in ríg nirbo romall.
93] "Adaig-seo dered din ló,"
94] ar Find féin, ní himmargó:
95] triar tancammar ille
96] táeit róinn d'iarraid fhianbothe.
97] D'éccain radéch úad in rí
98] forsin carraic da láim chlí,
99] co facca in tech cona thein
100] issin glind ararmhbélaib.
101] Atrubairt Find flaith na fian:
102] "assiut tech nach fhacca riam:
103] a Chailti, ni chuala thech
104] isin glind-sea cid am eolach."
105] "Is ferrdúin dula dia fhiss{MS page 207a}106] atá mór neich 'narn anfis:
107] is firt féli, is ferr cach ní,
108] a maic Cumaill, a airdri!"
109] Dochuammar ar triar 'sin tech,
110] terus aidche rab aithrech,
111] dia fríth gol is gréch is gáir,
112] is munter díscir dígair.
113] Aithech líath fora lár thair
114] gebid arn-eich co-escaid,
115] dúnaid comlaid a thaige
116] de baccanaib íarnaide.
117] "Is mochen, a Fhind co mblaid"
118] ar int-aithech co harnaid:
119] "fota co tanac ille,
120] a maic Cumaill Almaine!"

121] Suidmít ar in cholbu chrúaid,
122] doní ar n-ósaic ri óenuair,
123] láid connud truimm fora thein.
124] súail naron-much don dethaig.
125] Bái callech isin taig mór,
126] trí cind for a caelmuneol,
127] fer can chend 'sin leith aile,
128] oenshúil asa ucht-saide.
129] "Denaid airfitiud don ríg!"
130] ar int-athrech cen imshním,
131] "érgid, a lucht atá istig,
132] canaid ceol don rigfhennid!"
133] Ergit nói colla assin chúil,
134] assin leith ba nessu dúin,
135] is nói cind issin leith aile
136] forsin cholbo iarnaide.
137] Tócbait nói ngrécha garba,
138] nir chuibde ciar chomlabra:
139] frecraid in challech fósech,
140] ocus frecraid in méidech.
141] Ciarbo rogarb céol cach fhir
142] ba gairbe céol in médig;
143] ca céol díb narbo dúla
144] acht céol fhir na oenshúla?
145] In ceol sain rocanad dúin
146] dodúsechad marbu a húir ;
147] súail na robriss cnáma ar cind,
148] nírbe in cocetul ceolbind.

149] Gebid int-aithech úain sair,
150] tócbaid fair in túaig connaid,
151] bualaid cohathlam ar n-ech,
152] fennaid, coscraid can fuirech.
153] "Bí tost, a Cháilti mar tái!"
154] ar Find fein cen immargái,
155] "maith lind dia ndama duin féin
156] damsa ocus duitsiu is d'Ossín.
157] Coica bera ara mbái rind
158] tuc leis do beraib cáirthind,
159] tuc ága ar cach mbir fosech
160] is rachoraig fon tellach.
161] Nochor 'bruthi bir díb sein
162] in tráth tucait ón tenid,
163] tuc leis i fiadnaisi Find
164] féoil om ar beraib ea[e]rthind.
165] "Beir lett, a athig, do bíad,
166] uair ní duadus biad om riam:
167] ni chathiub ondiu co bráth
168] arái beith ean bíad oentráth."
169] "Mas aire thanac 'nar tech
170] d'obba ar mhbíd", ar int-athech,
171] is derb doragaim rib féin,
172] A Chailti, a Fhind, a Ossín!
173] Iarsein roergemmar súas,
174] gabmait ar claidbe cocrúas,
175] gebid cach cend araile,
176] ropo mana dorngaile.
177] Muchthair in tene bái thís,
178] nar' léir a lassar no grís,
179] timmaircther cúl dorcha dub
180] orn artriúr in-oen inud.

181] Inuair dobímmis cind ar chind
182] cia nar cobrad acht mád Find,
183] ropsar marba, mór in mod,
184] meni beth Find a oenor.
185] Bammar cind ar chind istaig
186] fat na haidche co matain,
187] co roshollsig grian in tech
188] im thrath eirgi arnabarach.
189] Innuair doérig in grian
190] tuittid cach fer sair is síar
191] tuitiid nél i cend cach fhir
192] com-bái marb arin lathir.
193] Garit robammar 'nar tám,
194] ergimmít súas, is sind slán:
195] celtair orn in tech iar sain,
196] celtair cech nech din muntir.
197] Is amlaid atracht Find Fáil,
198] ocus a ech féin 'na láim,
199] slán uile etir chend iss choiss
200] bái cach anim 'na écmais.
201] Lodsam coscíth anfand ass,
202] tucsam aichne arar neolass,
203] lodmar ciarbo chían iarsain
204] cosin traig ic Berramair.
205] Roiarfaiged dín scela,
206] ni bái dúin dluig a shéna:
207] "fuarammar", ar Find, "diar fecht
208] imned ar arn-óigidecht."
209] Isiat sin dorala rind,
210] na tri fuatha a hIbarglind,
211] do digail fhoirn a sethar,{MS page 207b}212] diarb' aínm Cullend craeslethan.

213] Lodsamar ar cuaird selgga
214] morthirachell insi Elgga,
215] sirmís mór sliab is mór mag,
216] mór n-amreid is mór n-oenach.