Cridhe so dá ghoid uainne

1] Cridhe so dá ghoid uainne, —
2] cá ní is truaighe for talmhain
3] ná duine i mbí dá anam
4] do bheith tamall gan anmain?
5] Uaimse ag inghin an iarla
6] truagh gan iasacht mo chroidhe,
7] go dtuigeadh féin nách bhféadar
8] bréagadh croidhe i mbí toirse.

9] Cuirfead iomchar mo chroidhe
10] ar dhuine oile i-mbliadhna;
11] gidh eadh, dá gcleachta a iomchar,
12] biaidh sí diomdhach don iasacht.
13] Biaidh sí tinn, biaidh sí corrach,
14] biaidh sí gan chodladh choidhche,
15] biaidh sí ciamhair cumhach,
16] biaidh sí dubhach gach n-oidhche.
17] Ní iarrfa adhbhar gáire,
18] badh sáimhe lé bheith dubhach,
19] go sgara sí rem chroidhe
20] go bráth ní bhfoighe furtacht.
21] Uch! ní cothrom an roinn-se
22] do-ní an toirrse, dar linne, —
23] croidhe nó dhó ag duine
24] 's duine oile gan chridhe!