Corpus of Electronic Texts Edition
A sgríbhionn luigheas tar lear (Author: Giolla Brighde Ó Heoghusa)
p.139
Giolla Brighde Ó Heoghusa cct.
- 1] A sgríbhionn luigheas tar lear
2] ar amus innsi Gáoidheal,
3] déna mar aderam ruibh
4] ar senfhonn frémha Fíachaidh.
- 5] Gluaisidh reamhuibh tar Muir Meann
6] ar amus Uilliam Nuinnseann:
7] triall ar céilidhe 'na cheann,
8] ar ccéiline d'íath Éireann.
- 9] Innis uaimsi dá ucht slim
10] an ceó tuirrsi atá ar m'inntinn:
11] nocht cúis m'imnidh dá aithle
12] dá ghnúis tibhrigh thonnghairthe.
- 13] Doighthe cuartaighthe croidhe
14] mo lucht gáoil, m'aos ionmhuine:
15] na caraid dár threisi ar dtoil,
16] ní mharuid 's meisi ar marthuin.
p.140
- 17] Barr ar gach teidhm mar tá sinn
18] d'éis meanman Uilliam Nuinnsinn:
19] am beó ar sgarthain ré a ghné ghil
20] ní marthain é, ní hoighidh.
- 21] Dursan damhsa a dheaghuil ruinn,
22] fuighioll áir m'áosa cumuinn,
23] grian m'inntleachta úair oile,
24] clúain inghealta m'ionmhuine.
- 25] Áineas gan imdheargadh n-áoin,
26] féile ghnáth gan ghlóir ndíomháoin,
27] searc pobal, freagra go bfos,
28] tobar eagna gan fhorus.
- 29] Fuarusa re hais an fhir
30] seal dob áoibhne dárbh fhéidir
31] fan ráith ccuirr um bhráoinlios mBreagh,
32] 's gan áoibhneas an fhuinn d'áireamh.
- 33] Ní bhínn fiú an énláoi ré a ais
34] gan ghabhlán n-úaigneach n-eólais:
35] ar cceileabhradh dhúin is dó
36] neimhiongnadh m'úidh ar íarghnó.
- 37] Atú re treimhsi ndubhuigh
38] mar ésga a n-am urdhubhuidh:
39] dortadh flatha Dealbhna dhamh
40] fatha meanma do mhúchadh.
- 41] Do tsholus gnáth gun ghealaigh
42] ní bhí, as bladh dá hairdheanuibh,
43] acht an tan dearlaicthior dhi
44] bladh do ghealruithniodh gréine.
- 45] Gibé tráth a tteagoimh soin
46] don dara taoibh don talmhuin,
47] ní reich mong gréine 'na gar
48] tar méidhe trom na talmhan.
p.141
- 49] Tig cláochlódh dá cruth corcra,
50] tréigidh a tlacht íasochta
51] mun amsa a n-úair dheaghla dhi
52] ré a bfuair ón ghealgha gréine.
- 53] Mé an t-ésga, eision in ghrían;
54] mo ghlóir 's m'áineas ó Uilliam:
55] lá ar sgaraidh do sgaruid rum,
56] amhuil ní anuid agam.
- 57] Ní hiongnadh nach soisionn sinn
58] gach dealradh úaidh dá bfuighinn,
59] grían shídhe fionnbhrogha Floinn
60] tíre is iolmhara eadroinn.
- 61] Atá an tuirrsisi fam thuinn
62] mar thoirrcheas n-elphant aguinn:
63] re deich mbliadhnuibh rom chná an chneadh,
64] ó do bhá a ngrianmhuigh Gaoidheal.
- 65] Measuim féin nach fédfa mé
66] trághadh tobair mo thuirrse,
67] nach deich mbliadhnasa dá mbeinn
68] ag sgeith m'fhíabhrasa as m'inntinn.
- 69] A litir léigim anonn,
70] ní feas damh, móide ar mearbhall,
71] gé tarla an toisgse a ndán dáoibh,
72] doidse nach dál bhus díomháoin.
- 73] An lámh do fhoisgeóladh ibh,
74] gé táoi ag triall go tír bfuinidh,
75] mo thrúaighe, ní feas nach fuil
76] ré cneas úaidhe nó ar uluidh.
- 77] Dá ttigeadh litir a-le,
78] ní feas fós nach bíadh reimpe
79] ina sreath chnámh ccríon a ccill
80] an lámh rod sgríobh, a sgríbhinn. A Sgríbhionn.