Corpus of Electronic Texts Edition
Fúar liom an adhaighsi dh'Aodh (Author: Eochaidh Ó hEoghusa)
p.124
Ó Heóghusa .i. Eochaidh cct.
-
1] Fúar liom an adhaighsi dh'Aodh,
2] cúis tuirse truime a ciothbhraon;
4] mo thrúaighe sein dár seise,
5] neimh fhúaire na hoidhcheise.
-
5] Anocht, is neimh rem chridhe,
6] fearthar frasa teintidhe
7] a gcomhdháil na gclá seacdha
8] mar tá is orghráin aigeanta.
-
9] Do hosgladh ós ochtaibh néll
10] doirse uisgidhe an aiér:
11] tug sé minlinnte 'na muir,
12] do sgé an fhirminnte a hurbhuidh.
p.125
-
13] Gémadh fíaidhmhíol a bhfiodhbhaidh,
14] gémadh éigne ar inbhiormhuir,
15] gémadh ealta, is doiligh dhi
16] soighidh ar eachtra an úairsi.
-
17] Sáoth leamsa Aodh Mhág Uidhir
18] anocht a gcrích chomhoidhigh,
19] fá ghrís ndeirg gcáorshoighnén gceath
20] fá fheirg bhfáobhoirnél bhfuileach.
-
21] A gcóigeadh Chloinne Dáire
22] dursan linn dár leannáinne
23] idir dhorchladh bhfúairfhliuch bhfeóir
24] is confadh úaibhreach aieóir.
-
25] Fúar liom dá leacain shubhaigh
26] fráoch na n-iodhlann n-earrchamhail,
27] ag séideadh síongháoth na reann
28] fá ríoghláoch ngéigeal nGaileang.
-
29] Sáoth linn, do loit ar meanmain,
30] learg thais a thaoibh míndealbhaigh
31] 'gá meilt a ngrúamoidhche ghairbh,
32] a mbeirt fhúarfhoirfe íairn.
-
33] Bos tláith na dtachar n-édtláth,
34] síon oighridh dá fhúaighealtáth
35] re crann rionnfhúar gcáol gceise
36] ionnfhúar dh'Aodh san oidhcheise.
-
37] Nárab aithreach leis ná leam
38] a thurus timcheall Éireann;
39] go ndeach tharainn ná tí m'olc
40] an ní fá ngabhaim gúasacht.
-
41] Dá dtí ris an toisg do thríall,
42] do chur chúarta Chráoi Mhaicniadh
43] ní tháirtheamar séd mar soin
44] créd acht snáithghearradh sáoghail?
p.126
-
45] Líonaid re hucht na n-ánrath
46] brúaigh ísle na n-úaránshroth;
47] clúana sgor fá sgingbheirt reóidh
48] dá gcor tar inghelt d'aimhdheóin.
-
49] Folchar a gciomhsa cheana,
50] nach léir do lucht foirgneamha
51] brúaigh easgadh na ngríanshroth nglan,
52] seasgadh fíanbhoth ní fédtar.
-
53] Eagail dó, díochra an anbhúain,
54] coill eachraidh is aradhshlúaigh,
55] sul dighthir tar síothLáoi síar,
56] a slighthibh míonchráoi Mhaicniadh.
-
57] Ní hé budh uireasbhaidh linn,
58] a thurus an tráth smúainim;
59] lór do chor chúarta ar gcridhe
60] gomh fhúachta na haimsire.
-
61] Gidh eadh, is adhbhar téighthe
62] dhá ghnúis shúaithnidh shoiléirthe
63] slios gach múir ghormsháothraigh gil
64] 'na dhlúimh thonngháothmhair theintigh.
-
65] Téighidh teannál an adhnaidh
66] sging reóidh an ruisg shocarghlain,
67] geimhle chuisne a chorrghlac ndonn,
68] donnbhrat luisne nos leaghonn.
-
69] Seachnóin Mhumhan na múr ngeal
70] iomdha ó airgtheóir fhuinn Gháoidheal
71] cúirte brúachnochta a mbeirt smóil,
72] ag ceilt fhúardhochta an aieóir.
p.127
-
73] Iomdha ó chuairt Aoidh Mhéig Uidhir
74] feadh íarthair fhóid fhionnfhuinidh
75] cúirt 'na doighir, ní díoth núa,
76] críoch gan oighir gan íarmhúa. Fuar.