Corpus of Electronic Texts Edition

Cuimseach sin, a Fhearghail Óig (Author: Fear Flatha Ó Gnímh)

p.118

1. 
   1] Cuimseach sin, a Fhearghail Óig,
   
   2] fuarois tiodhloicthi ón Tríonóitt;
   
   3] gan feidhm ndaghoide ar do dhán
   
   4] ag deilbh ghlanoige ar ghearrán.
2. 
   5] Gan boith ndiamhoir, gan deacoir,
   
   6] cead áinis as airdcheapaidh,
   
   7] scor raifhérach, radharc cnoc,
   
   8] amharc aiérach accat.
3. 
   9] Donnchadh Mór bu mhillsi dán,
   
   10] Giolla Brighde is beó iomrádh,
   
   11] días do thobhoigh grádh dá ngaois,
   
   12] dán ar conair ní cheapdaois.

---

p.119

4. 
   13] Ní bhiadh ag feithiomh gach fuinn
   
   14] cnuasach milis mheic Cearbhoill,
   
   15] fa Chluain Fraoich gér saoi soinnimh
   
   16] gan chnaoi ccaoich 'na chrobhoingibh.
5. 
   17] Bliadhain iomshlán d'Aonghas Ruadh
   
   18] re hucht ngill ar ghrés n-ionnfhuar;
   
   19] níor thaobh re mailís molta
   
   20] an fPailís chaomh chlárchorcra.
6. 
   21] Níor chum Sgolb, in dá rinn róibh,
   
   22] saoi gan énlocht, nó an t-Órthóir,
   
   23] dol tar a riaghail d'ágh ort,
   
   24] dán gan diamhoir gan dorchacht.
7. 
   25] Ní gluaisti le Gothfroidh Fionn
   
   26] dán ar nach dénadh dítheall;
   
   27] re blaosgach do bhiadh folamh
   
   28] riamh dob aonsgoth ealadhan.
8. 
   29] A leapthaibh dhénta duan ngill
   
   30] aghaidh Thaidhg Óig Iacute; Uiginn,
   
   31] ní hionand méin duitse as dí,
   
   32] dá huiscce féin do foilcthi.
9. 
   33] Misi féin dá ndearnoinn dán,
   
   34] maith leam —lughoide ar seachrán—
   
   35] bac ar ghriangha um theachta as-teagh,
   
   36] leaptha diamhra 'gar ndídean.
10. 
    37] Eadrom is eatoil ghlana
    
    38] muna n-iadhoinn m'aphradha,
    
    39] mar dhlaoi díona ar lés an laoi
    
    40] díogha dom ghrés do-ghéntaoi.
11. 
    41] Ni hionand gnáth damhsa is duitt,
    
    42] dá ndeachoinn do dheilbh adhmoid,
    
    43] fada m'uain ar aoidhidh roinn,
    
    44] uaill as mo laoidhibh locoim.

Coimseach sin.