Corpus of Electronic Texts Edition

Mo chean duitsi, a thulach thall (Author: Laoiseach Mac an Bhaird)

p.51

1. 
   1] Mo chean duitsi, a thulach thall,
   
   2] fád thuisleadh ní subhach sionn;
   
   3] damhna sgíthi do sgeach dhonn,
   
   4] cleath chorr do-cíthe ós do chionn.
2. 
   5] Sgeach na conghára, crádh cáigh,
   
   6] 'na háit comhdhála do-chínn;
   
   7] buain na craoibhe, mo lá leóin,
   
   8] daoire 'na dheóidh mar tá an tír.
3. 
   9] Dubhach mo chridhisi um chum
   
   10] fád bhilisi, a thulach thall;
   
   11] an chleath ó bhfaicinn gach fonn,
   
   12] do sgeach chorr ní fhaicim ann.
4. 
   13] Do bhíoth dhamh ag dénaimh eóil,
   
   14] an ghégsoin fá gar do mhaoin;
   
   15] fada siar ón tírsi thuaidh
   
   16] aniar uaim do-chinnsi an gcraoibh.
5. 
   17] An ghaoth ar bhfoghal a fréamh,
   
   18] craobh gan bhloghadh doba buan;
   
   19] ní tearc neach dá ndearna díon,
   
   20] sníomh na sgeach fá teadhma truagh.
6. 
   21] Gég chruthach bá corcra lí,
   
   22] mé dubhach má dol fá dhlaoi;
   
   23] mairg nár smuain ar dhaoirsi nDé,
   
   24] 's go bfuair mé fád chraoibhsi caoi.

---

p.52

7. 
   25] Do teasgadh ar n-aoinchreach uainn,
   
   26] an chaoimhsgeach dob easdadh d'eón;
   
   27] sgé a samhla níor fhás a húr,
   
   28] dhúnn go bás badh damhna deór.
8. 
   29] Mo chréidhim go bruach mo bháis,
   
   30] mo-nuar nach éirghionn ar-ís;
   
   31] ní fhaicim cnoc na gcleath gcnuais
   
   32] nach gluais lot na sgeach mo sgís.
9. 
   33] Cnoc na gconghár, crádh na sgol,
   
   34] a n-orláimh námhad a-niodh;
   
   35] d'éis a learg as dubhach dhamh,
   
   36] tulach ghlan do chealg mo chion.

Mo.