Corpus of Electronic Texts Edition

An Old Irish poem on St. Patrick (Author: [unknown])

p.303

1. Pátraicc Macha mártai Gáidil,
   glaine ríagla,
   pritchais doïb cen chleith coemna
   sé deich mblíadhna.
2. Bathais Pátraic fodaróenaig,
   rígda ind ríagail,
   dus-fuc Pátraic cen ail n-úaboir
   a taig díaboil.
3. Doïb bas brithem dia brátha,
   bret[h] as doidngiu,
   ní fuil nóeb conní a airde
   co tí in Coimdiu.
4. Coimdiu feisin dou doridnacht
   fonn ar feraind,
   is leis fír gach Góidil glanuill
   do hsíl Breguinn.
5. Bratir dún ardabstail Érenn,
   ind nóib róitir,
   rothecht seochu mac mec Fotaid
   cert cech cóicid.
6. Co rooirdnestar slúag sacart,
   sruith in díne,
   lín forsrolég grád co núibe,
   teora míle.
7. Mad in slúag n-ardepscop n-úasal,
   úaisliu dánaib,
   secht cóicait n-epscop n-úag n-óebin
   úad fo grádaibh.
8. Grían gel Góidel, glére garta,
   réle ar rechta,
   lé[i]r ralég cen luithe lochtai
   suithe sechta.
9. Secht cét aipgitrech ra-scríbai,
   screptra scríbenn,
   secht cét celd ba cáin dos-rorann
   do Máil írenn.
10. Ardchell dorráighai dó feisin,
    fonn na flatha,
    adba n-arcc n-óg íarthair betho
    Ard mór Macha.
11. Madh an ro-dúsaig do marbaib,
    is mó mílib,
    ní fail cenn conní a árim,
    is drem dírim.
12. D'egnuib íarthair dúisig domuin
    is dó tárctait,
    do lou bráthai cech fis fírtait
    is fris dáltait,
    is é a flaith fírda fóemtaitt
    prímda Pátraic.

    Pa.

13. Epscop Hérenn ocus sacart,
    sruithe sámtait,
    d'egnoibh Érenn is ed légdait,
    légenn Pátraic.

    Pat.