Corpus of Electronic Texts Edition
Bringt euer Haus unter Dach! (Author: Goffraidh Ó Cléirigh)
p.236
Bringt euer Haus unter Dach!
{MS page 57a2}In Gobraith cétna cecinit.
- Fada go tuigim mo theach,
ní fada gu cluinim cith,
mían turaid gibé ara mbeth,
ní hé a t[h]ech bunaid in bith.
- Súairc lem a mhná ocus a midh,
gerr a c[h]úairt, ca lá nach leagh?
ní fót caraim-sea as clé dam,
ní hé in mag tadaill-sea ar teag.
- Teach ar n-athar dúind as dúal,
scathad a suidhi bidh sámh,
teagdais nár lean dath na díadh,
ní treab críad ná clach ná clár.
- Is mé in t-én, is é ar sruth,
ocus is mé bél na mbreath,
is cerdc[h]a antí bruithni in bith,
da tí in cith, ní tuigthi ar teach.
- Mo theach nocht gan ní as mo chind,
as gort geal nach bí fa barr,
nocht leaga[i]r gach nech a-nund,
eagail ma toll in tech thall.
- Beart da búain fúm as dú dam,
isam cú gan cúl re crodh,
maith ar fáidh nemhdai-ne in-neamh
'san teagh seanbaile as dáigh dul.
- Olc da geib a formáil úaim
do scéimh in domná[i]n gan dín,
peand oile ag indlach mo táem,
sáer mo thoighi as dimdach dím.
- Beg a feidm da degbois Dé
deilb dá tegdais inó trí,
almsa ar neamh ocus neach fái,
dlái tar in tech is ed hí.
- Tuigium romaind gu ría a-rís,
'sa colaind ná cuirem spéis,
comhla gen gob í rem bæis,
m'æis is í da orbha ar m'éis.
- Nár ar colla as doilig dúin,
rolla mo c[h]laidhim da címh,
mar tá ar n-anamh ach! do phéin,
a caland féin 'ga brath bíd.
- Da-cóid Día a croich tar mu chenn
gan móid na croich da ría rium,
cid slán mo bas as mo bond,
toll a lám 's a chas dum chind.
- Trúag mar da ruib tinmi a táeib
dar cind-ni etir fuil as feóil,
mac Dé da crochad da-cúaid,
ní fúair sé acht dochur da dheóin.
- Gid meath n-uthrais úaim da cneidh
lúagh1 a uthrais noco fuil,
ma[i]rg nach biath bocht asa thigh
is ar tsíl clíath ochta d'fuil.
p.237
- A duine nád gabad gráin
re nduine ar scarad re scéim,
bid bán corp oile go húaig,
olc in trúaill a foile féin.
- A anam dan athair Día,
nach da thigh caland da crú,
dligi úaisli ón fuil a mbía,
Día da cuir 'na trúaillsi tú.
- Soithech deid ó Día a ndúl
nach bía acht co creic ad-cíam,
cinntach in corp rit fa-rír!
olc da díl isa cip críad.
- A rígan-sa tug Día dam,
ar Dia ná rab drud re cin,
lán da thachur as d'feirg t'fear
eirg co teagh t'Athar odt fir.
- Tug ragain da cách ad-cíu
nach tabair ar bráth i mbía,
rígthech gel, Coimhde gan ceó,
as teg na reó doirche ag Día.
- Fata úaim rígthech mo Ríg,
gid co búan bith 'na dún,
dar ndrut ón chéilidi cláen
tug ar sær drémiri dún.
- Báeth fer ar céili-ne a curp
gan dréimire ar nem a-nocht,
doilig léimenna crand cert,
secht céimenna and nó hocht.
- A háen díb in umla uis
gusin Ríg fa cubra cnis,
taca a n-airde an-ond an-ois,
mairg cois isa bond fa mbris.
- A dó díb, goiridi a greim,
ní foidi[ti] nach ar fill,
mairg téid a tacaib in chraind,
doill as bacaig da éid ind.
- A trí in fírinne go n-æib
co rab hí ar fírinni féin,
atá ind uball fallsa fóind,
cóir dam-sa dul and re dréim.
- Fáeisidi in cethramad cuing
cona brethlogad as bind,
céim eile asa ngebam greim
cé beram leind eiri an-und.
- Sechbaid oilbéime cach áein
as do dréimire na gach dréim,
feidm bóideadh dáeine da deóin
æine in beóil in cóiced céim.
- Aithrigi is í in seiseadh fós,
cach deisel is dí da-cúas,
deor craidi as caland fa scís,
aband bís ag snaigi súas.
- In sechtmad céim, céim co rath,
a nertad as céim ar crith,
céim trócaire nár tréig nech
tech sópaire ar bréig in bith.
- Céim na déirce in ochtmad air,
foclad ar n-éigni ní fil,
samail teasa dun gréin glain
céim sin as neasa do nim.
- Rom-roiche a lúirech gach lái
as mo cúl leth re croich nDé,
logud mo sel ceilgi a clí
dontí dan fer meirgi mhé.
- Cathugad ceilgi as clé dúind
ocus mé fa meirgi in Ríg,
ná bid anos cath gun clód,
mór da snath mo chros da crín.
- Maith in talam, trúag in brég,
'ga adrad as trúag mar tad,
rachdæid da mhuin ræn as ród
gach tæb óg ar nach fuil fat.Fata.