Corpus of Electronic Texts Edition
Die Helden von Emain Macha (Mongán mac Fíachna cecinit do thecosc a athar) (Author: [unknown])
{ms page 158}

p.217

Die Helden von Emain Macha

Mongán mac Fíachna cecinit do thecosc a athar.
  1. A Fíachnæ ná ráid in gæ,
    is buidech Día do cach fír,
    bretha córa for cach dáil,
    is ed dlegair do cach ríg.
  2. Mad cumma ech ocus ech,
    mad mé no-thecmad oc rath,
    madat comlúatha frim les,
    ním-lúaidfed mes(?)1 ara ndath.
  3. Dóine bátar sunn co se
    for bruinnib Emna Mache,
    mad dia no-s-tísed taithlech,
    a n-húabur isim aithrech.
  4. Fergus mac Léite in rí
    no-lúaided cairptiu ar Machi;
    Ulaid cen écnach, cen on,
    dia éis ro-s-gab Conchobor.
  5. Nochon do biuc bæ dia bríg,
    ba ferr Conchobor cach ríg,
    acht in Rí ro-delb in sam,
    coimdiu nime ocus talman.
  6. Ba fíal Cacht mac Ilguine,
    ba suithc[h]erna fria guide,
    mad ar a búar cessed nech,
    roindfed a chrod i certleth.
  7. Ropu chalmu læchaib Lúar
    bale i comraiced cach slúag,
    is é bas genaige tra
    cach duine nácha chúala.
  8. Meicc beca ní geibtis eill
    do Muinremur mac Geirrceind,
    menad leis oc úaim a brond
    tan na n-gonta i cath comthrom.
  9. Nochon fuilgitis na liúin
    buille Fergusa fortriúin,
    no-daimtis cauraid cára
    do mac Roäich rodána.
  10. Dá h-úa Roäich rúamna gass
    Illann ocus Ilarchass,
    trí h-úi Chleite, comol n-glé,
    Hiruth, Húath is Aislingthe.
  11. Macne2 Conchobuir ind ríg,
    la Ultu ba mór a m-bríg,
    ní ro-thimchell cath ná crech
    nónbur ar-do-sáraigfed.
  12. Cormac Con Loingess don Laind,
    Fíachna, Glaisne ocus Conaing,
    Maine, Cuscraid, comol n-glé,
    Findchad, Fíachu, Furbaide.

    13. p.218

  13. Clann Amargin ercctha chned,
    Conall Cernnach a sinser,
    Mess Dé is Mess Dedaid dían,
    Lægaire, Cass, moam bid3 bían.
  14. Trí meic Fíachrach a Cúailnge,
    cethern no bíd fri h-úaibre,
    fri gail ní cómclóitis dath,
    Ross is Dáre is Findchad.
  15. Ní fácbaitis ní dia n-urd
    macne Durthecht a m-Murbulg;
    is cían ó thánic a r-ré
    Eogan, Crimthan, Congal Clé.
  16. Macne Uislenn ard a n-gus
    maith a teglachus h-i fus;
    reithitis caurach dar sál
    Nóisse is Aindle is Arddán.
  17. Ibar coicthi cinnas lat?
    ocus trí meicc Ríangabrat,
    Foroll ón tuind, trén a ferg,
    Conall cuinnid, Áed óderg.
  18. Fer ro-bæ sund fria4 sella
    Bricriu noithech neimthenga;,
    dí cích mná no chlóitis leis,
    ba méiti no-s-imrestais.
  19. Ailill Miltenga nád mair,
    is dia innisin no-m-fhail,
    fir domain dia n-delbtais cath,
    ba derb ar-do-sídaigfed.
  20. Gilla no-bíd sunn innu
    diarbu chomainm Caulaind Cú,
    ro-bæ a h-úamun in cach airm,
    co mair a ainm in cach dú.
  21. Is lía a turim ar cach dáil,
    is leór sin dia túarascbáil;
    nochon fúaratar5 fria ré
    slúag fo nim dia n-ergaire.
  22. Dia m-bátar i n-Emuin úais
    muinter Conchobuir co crúais,
    triär as cach cóiciud cain
    daimtis cert d'óenfiur d'Ultaib.
  23. Ro-scáchatar sin uile,
    nocho mair díb óenduine,
    is erchraidi in domun dái,
    cid nách déice, a Fíachnai.

    A.