Corpus of Electronic Texts Edition
Caíni amra laisin m-Bran (Author: [unknown])

p.92

Manannán, god of the sea, describes his kingdom to Bran and predicts the birth of Mongán

  • Imram Brain par. 32
  • Luith íarum Bran ara várach for muir, tri nónbuir a líon: aonfear for na tri nónburuaiv día chomaltaibh & comaísaib. Ó ro buí dí lá & dí aidchi forsan muir co n-aci a dochum in fer isin charput ísan muir. Canaid in fer hísin dano tríchait rant n-aile dóu, & sloinnse dóu, & is-bert ba hé Manannán mac Lir, ocus as-vert báoi aire táoidecht n-Érinn íer n-aimsiruiv cíanaiv, & no gigned mac hóad .i. Mongán mac Fíachnai iss ed forad-mbiad. Cachuin íerum in tríchait rannsa dóu:
    1. Caíni amra laisin m-Bran
      ina churchán tar muir n-glan;
      os mé, am charput do chéin,
      is magh sccothach ima-réidh.
    2. A n-us muir glan
      don náoi broindig a tá Bran,
      is Mag Meall co n-iumat scoth
      dam-sa a carput dá roth.
    3. At-chí Bran
      lín tonn tibri tar muir n-glan.
      At-chíu ca-déin i m-Magh Mon
      sgotha cennderga gin on.
    4. Taithnit gabra lir a sam
      sella roiscc ro sire Bran.
      Brunditt sscotha sruaim do mil
      a crích Manannáin mic Lir.

    5. p.94

    6. Lí na fairge fora taí,
      geldod mora imme-roí:
      ra sert buidhe & glas;
      is talam nád écomrass.
    7. Lingit ích bricc ass de brú,
      a muir finn forn-aiccisiu;
      it láoig it úain co n-dath, .i. it láoi & it úain na bratána at-chí Bran
      co cairde, cin imarbad.
    8. Cé at-chetha áonchairpteach
      i m-Mag Meall co n-immat scoth,
      fil mór di echaib ar brú,
      cen suide, nát aiccisiu..i. boí mór dírimi ina farrad ocus ní faca Bran
    9. Métt in maigi, líon int slóig,
      taitnit líga co n-glanbóaid;
      finnruth airgit, drepa óir,
      táircet foílti cech imróild.
    10. Cluithi n-aímin n-inmeldag
      aigdit fri (fin nimborbad),
      fir is mná míne, fo doss,
      cen peaccad, cen immorbus.
    11. Is íarr m-barr fedha ro-sná
      do churchán tar innrada;
      fil fid fo mes i m-bí gnóe
      foa bruinne do bhecnáoi.
    12. Fid co m-bláth & torad
      for m-bíd fíne fírbolad,
      fid cen erchra, cen (esspath,)
      fors fil duille co n-órdath.
    13. Fil dún ó thossuch dúili,
      ce aíss, cin (orphthi) n-úire;
      ní fescam (dembethangus);
      nín-táraill int immorbus.

    14. p.96

    15. Olcc líth do-luith ind nathir
      cosind athir día chathair;
      saíbse, ceni, i mm-bith ché
      co m-bu h-aithbe nád bhue.
    16. Ron-ort h-i cróess & saint
      tresa n-derbaid a h-sáoerchlaoind;
      ethaiss, corp crín, cró péne,
      ocus bithaittrev rége.
    17. Is recht úabair in bith ché
      creidem dúile,.i. adradh ídal dermat Dé,
      troíthad n-galar & aíss,
      aptha anma tría thogaís.
    18. Tiucfa tessorcan .i. Críst h-úasal
      h-ónd Ríg do-rea-róssat;
      recht find fu-glóisfe muire;
      sech bidh Día bid duine.
    19. In dealb í no fethe-su
      ro-hicfa it lethi-su;
      arrum-thá echtra día tigh
      cosin mnáoi i l-Linimhaig. .i. coimpert Mongáin
    20. Sech is Manannán mac Lir
      asin charput cruth in fir,
      bied día chlaind (densa n-gair)
      fer cáoin hi curp críad adgil. .i. MongánMoggán
    21. Con-lee Manannán mac Lir
      lúth lighe la Cáointigirn:
      gérthair día mac i m-bith gnó;
      ad-ndidma Fíachna mac n-dó.
    22. Moídfid sognáis gach sídhe;
      bid treitil cach daghthíre;
      at-fíi rúna (rith ecne)
      isin m-bith can a ecli.

    23. p.98

    24. Bieid hi fethol cech míl
      itir glasmuir & tír;
      bid drauc re m-buidnib hi froiss;
      bid cú allaid cech indroiss.
    25. Bid dam co m-bennuiph argait
      h-i mruig i nd-agthar carpait;
      bid écni brec i l-linn láin;
      bid rón, bid eala fionnbán.
    26. Biaid tre bitha síora .i. post mortem
      cét m-blíadna hi findríghe;
      silis tearca (lecht imchían); .i. amra infoircnedeg .i. in futuro .i. in corpore.
      dergfaid (?) roí roth imrían.
    27. Im ríga la (féinnid)
      bid láth gaile fri aichni;
      (ininnach) m-brogha (foraa)
      fo-chicher airchend (ailli.) .i. proprium Iloch
    28. Art (aru-ngén) la flaithe;
      gébthair fo mac n-imragne;
      sech bid Moininnán mac Lir
      a athair, a fithigir.
    29. Bied bess n-gairit a ree in corpore
      coícuit m-blédna i m-bith chee;
      oircthi ail dracoin din muir .i. isí agid Mongáin cloch asin tadbaill ro láad doa.
      h-isin níth h-i Senlabair. .i. dún.
    30. Timgéra dig a l-Log Láu .i. post mortem
      in tan (frisseill sidan) cráu;
      gébtha in drong finn fau ruth néal
      do nássad nát etarlén.

    31. p.100

    32. Fossad air sin imraad Bran;
      ní cían co Tír ina m-Ban;
      Emna co n-ildath féile
      riccfa re fuined n-gréine.