Corpus of Electronic Texts Edition
A Mór Maigne Moige Síuil (Author: [unknown])
p.88
On the loss of a pet goose
- A Mór Maigne Moige Síuil,
bec a dainme esbaid n-éoin;
má saíle éc duit fo-déin,
nách bét dot chéill caíne géoid?
- A ingen Donnchada druin,
ara fuil borrfada ban,
nách cúala scél (solma sein),
inn úair fot-geir do géd glan?
- Nách cúala (garc nat don gléo)
is marb Conn Cétchathach Cúa,
ocus Corbmac, ocus Art?
esbach in mac is in t-úa.
- Nách cúala díl Crimthainn chóir,
meic Fidaig, do finnchloinn áin,
ocus Éogain Taídlig tess
fo-cheird cess for Clíu Máil?
- Nách cúala in n-gním n-geimlech n-garc,
marb Eochaid Feidlech na ferg,
ocus Crimthann, cride Níad,
ocus Lugaid Dá Ríab n-Derc?
- Nách cúala (in íuboile n-airc)
dá b-fuair Íugaine núall n-uilc?
Nách cúala in foraire, fecht,
dá ro melt Conaire Cuilt?
p.90
- Nách cúala Mongán, maith láech,
do thuitim hi condáil chrích,
ocus Cermait Milbél mín
mac in Dagda déin do díth?
- Nách cúala in lámdaith do lot,
Cú Chulainn rop ánrath ait?
Ocus (ní ra-fannaig) fer
do neoch ro gab gaí 'na glaic.
- Nách cúala in n-gním n-galann n-gann,
Fothad Canann (clú nád binn),
ocus in rígféinnid ríam
dárb ainm toísech na Fían Finn?
- Nách cúala Fergus, cíarb án,
dárba lán cech lergus lór,
ocus Manannán mac Lir
a m' anamán min, a Mór?
- Géoid i n-Éirinn re linn m-Bríain,
Brían ro gab Éiblinn co n-ór;
maith cara fil ocut Brían:
fíal flaith Chinn Mara, a Mór.