Corpus of Electronic Texts Edition
Tórramat do nóebaingil (Author: [unknown])
p.44
Evening hymn
Pátraic dixit:
- Tórramat do nóebaingil,
a Chríst meic Dé bí,
ar cotlud, ar cumsanad,
ar lepaid co l-lí.
p.46
- Físsi fíra foillsiget
'nar cotaltaib dún,
a Ardflaith inna n-uile
a Ruire na rún.
- Ná millet ar cumsanad,
ar cotlud lainn lúath,
demna, erchóit, aidmilliud,
aislingi co n-úath.
- Rop cráibdech ar frithaire,
ar monar, ar mod;
ar cotlud, ar cumsanad
cen terbaid, cen tor.