Corpus of Electronic Texts Edition
Is mebul dom imrádud (Author: [unknown])

p.38

On the flightiness of thought

  1. Is mebul dom imrádud
    a méit élas úaimm:
    ad-águr a imgábud
    i l-ló brátha búain.

  2. p.40

  3. Tresna salmu sétaigid
    for conair nád cóir:
    reithid, búaidrid, bétaigid
    fíad roscaib Dé móir,
  4. Tre airechtu athlama,
    tre buidne ban m-bóeth,
    tre choillte, tre chathracha —
    is lúaithiu ná in góeth,
  5. Tresna séta sochraide
    ind ala fecht dó,
    (tre
    [gap: faulty text/extent: 3 syllables]
    dochraide)
    fecht aile (ní gó).
  6. Cen ethar 'na chlóenchéimmim
    cingid tar cech ler;
    lúath linges 'na óenléimmim
    ó thalmain co nem.
  7. Reithid (ní rith rogaíse)
    i n-ocus, i céin;
    íar réimmennaib robaíse
    taidlid día thig féin.
  8. Ce thríalltar a chuimrech-som
    nó geimel 'na chois,
    ní cunnail, ní cuimnech-som
    co n-gabad feidm fois.
  9. Fóebur ná fúaimm flescbuille
    ní-tráethat co tailc;
    sleimnithir eirr n-escuinge
    oc dul as mo glaicc.
  10. Glas, nó charcar chromdaingen,
    nó chuimrech for bith,
    dún, nó ler, nó lomdaingen
    nín-astat día rith.

  11. p.42

  12. Táet, a Chríst choím chertgenmnaid
    díanid réil cech rosc,
    rath in Spirta sechtdelbaig
    día choimét, día chosc.
  13. Follamnaig mo chride-sea,
    a Dé dúilig déin,
    corop tú mo dile-sea,
    co n-dernar do réir.
  14. Rís, a Chríst, do chétchummaid:
    ro bem imnma-llé;
    níta anbsaid éccunnail,
    ní inonn is mé.