Corpus of Electronic Texts Edition

A Marbán, a díthrubaig (Author: [unknown])

p.10

King and hermit

1. A Marbáin, a díthrubaig,
   cid ná cotlai for colcaid?
   Ba meinciu duit feiss i-m-maig,
   cenn do raig for lár ochtgaig.
{speech Marbán}
2. ¹Nicon cotluim for colcaid
   gé bethear com imslánud:
   atáaid sochaidi² amoig
   atraicc hocim imrádud.
3. Ní marutt ar comolta,
   scarad fri nínlúaidi:
   acht mád óinsessoir namá
   ní mair nech díouh, a Gúaire.
4. Ornait ocus Lugna lán,
   Laidgén ocus Ailirán,
   atá cechturde fri dán,
   Marbán ocus Cluithnechán.
5. Rochluinis mo tiomna-sa
   frie húir techta don domun:
   mo qhúach-sa din díthrebach,
   mo crain do Laidgén lobhor.
6. Mo scían is mo spedudhud,
   ma trebad i Túoim Aidchi,
   mo lourc, mo crain, mo cúach,
   mo tíag lethoir, mo cairchi.
{speech Guaire}
7. A Maruáin, a díthrubaig,
   cid dia tiomna docúaid?
   di don fior cerda a rath,
   acht a brath do Mac Dúaid.
{speech Marbán}
8. Atá úarboth dam i caill;
   nís-fitir acht mo Fhíada;
   uinnius di-síu, coll an-all,
   bile rátha, nosn-íada.
9. Dí ersainn fraích fri fulong
   ocus fordorus féthe.
   Feraid in chaill immá cress
   a mess for mucca méthe.
10. Mét mo boithe — bec nád bec,
    baile sétae sognath.
    Canaid sian m-binn día beinn
    ben a l-leinn co londath.
11. Lengait doim Droma Rolach
    assa sruth róeglan.
    Fodeirc essi Roigne rúad,
    Mucruime múad, Móenmag.
12. Mennután díamair desruid
    día m-bí selb sétrois.
    Día déxin in rega limm?
    (Rofinn mo bethu it écmais.)

---

p.12

13. Mong co (libri)
    ibair éoglais:
    nósta cél!
    Caín in magan:
    márglas darach
    darsin sén.
14. Aball ubull
    (mára ratha)
    m-bruidnech m-bras;
    barr dess dornach
    collán cnóbec
    cróebach n-glas.
15. Glére thiprat,
    essa uisci
    (úais do dig) —
    bruinnit ilair;
    cáera ibair,
    fiadait, fir.
16. Foilgit impe
    mucca cenntai,
    cadlaid, uirc,
    mucca alltai,
    uiss aird, ellti,
    bruicnech, bruic,
17. Buidnech sídech,
    slúag tromm tírech,
    dál dom thig;
    ina erchaill
    tecat cremthainn:
    álainn sin!

---

p.14

18. Caíni fleda
    tecat (moteg,)
    tárgud tricc,
    uisce idan
    barrán (bitchai,)
    bratáin, bricc.
19. Barrán cáerthainn,
    áirni dubai
    draigin duinn,
    túarai dercna
    cáera lomma
    (lecna luimm.)
20. Líne ugae,
    mil, mess, melle,
    (Día dod-roíd),
    ubla milsi,
    mónainn derca,
    dercna froích.
21. Coirm co lubaib,
    loc di subaib,
    somlas snó,
    sílbach sciach
    derca iach,
    áirni chnó.
22. Cuach meda
    colláin cunnla
    co n-dáil daith;
    durcháin donna,
    dristin monga
    mérthain maith.
23. Mad fri samrad,
    suairc snóbrat,
    somlas mlas,
    curair, orcáin,
    foltáin glaise,
    glaine glas;

---

p.16

24. Céola ferán
    m-bruinne forglan
    forom n-dil;
    dordán smálcha
    caíne gnáthcha
    úas mo thig;
25. Tellinn, cíarainn,
    cerdán cruinne,
    crónán séim;
    gigrainn, cadain,
    gair ré samain,
    seinm n-gairb chéir;
26. Caínciu gestlach,
    druí donn desclach,
    don chraíb chuill;
    cochuill alaid
    snaic ar daraig,
    aidbli druing.
27. Tecat caínfinn,
    corra, faílinn;
    fos-cain cúan;
    ní céol ndogra
    cerca odra
    a fráech rúad.
28. Rescach samaisc
    (a) samrad
    (soilsiu sín):
    ní serb sáethrach
    úas maig máethlach
    mellach mín.
29. Fogur gaíthe
    fri fid flescach,
    forglas néol;
    essa aba;
    esnad ala:
    álainn céol.

---

p.18

30. Caíni ailmi
    ardom-peitet,
    ní íar n-a creic:
    do Chríst, cech than,
    ní mesa dam
    oldás deit.
31. Cid maith latsu
    a n-do-milsiu,
    mó cech maín;
    buidech liumsa
    do-berr damsa
    óm Chríst chaín.
32. Cen úair n-augrai,
    cen deilm n-debtha
    immut-foich,
    buidech dond Flaith
    do-beir cech maith
    dam im boith.
{speech Guaire}
33. Do-bérsa mo ríge rán
    lam chuid comorbsa Calmáin,
    a dílse co úair mo báis,
    ar beith it gnáis, a Marbáin.