Corpus of Electronic Texts Edition
Togail na Tebe (Author: Unknown)

book 7


2589]

O tarnic tra in cluichi caintecha sin, rodoirt Adraist fin aran
2590] adnocol, & robui ac molad in gilla amal dea uasal adartha, & is
2591] ed roraid: ‘A mic,’ ar se, ‘dogentar amal so idbarta ac Grecaib

p.166


2592] uili gacha bliadna duid-seo, & da taet lindi tigi na Tebi tret
2593] chumachta-su, bidid mo honoir idbarta aris acaindi.’ Et is ed
2594] sin ba hail do Grecaib uili da rad.


2595]

As i sin, immorro, aes & uair dobi imshnim mor ar menmain
2596] Ioib mic Satuirn, uair ua fada les-sum comnaidi na
2597] nGrec i n-ingnais in chatha, & is andsin tucad a mac .i.
2598] Mearcuir dochum Ioib, & is ed roraid ris: ‘Erig,’ ar se, ‘d' indsaigid
2599] Mairt, dea in chatha, & abair risna Greic d' adandad
2600] dochum in catha.’ Et roerig Mercuir & dosiacht co tigib
2601] seselbacha Mairt, mic Ioib, dea na cath & na congal, & raid ris
2602] na Greic & na Tiabanda do chur a cend a chele.


2603]

Roerig tra Mairt lasin ngresacht sin, & tanic remi dar
2604] trachtaib traga Eipir co mullach slebi Acorintus iter in muir
2605] nIond iar n-airthiur & muir nEig ar n-iarthur. Roscail uad
2606] andsin ecla & aduath, ferg & fuasnad ba sluagaib Grec, co
2607] rolingsedar menmanda risin fogur bres adchualadar i firmamint
2608] uasa cind & risin scel n-aduathmar n-urbadach sin. Et
2609] rocraith a slega & a sceith, & rotrenbuail a eocho uas cind na
2610] sluag, cor-gab saínt & ailgius catha & comlaind na curaid isinn
2611] uair sin risin ngresacht & risin laidiud sin tuc Mairt mac Ioib
2612] forru.


2613]

O 'tchondairc, immorro, Baich mac Ioib, dei inn fhina, na
2614] Greic 'na mbuidnib degshluaig ac comlugud dochum na
2615] Tebei, tucad iachtad & osnaid mor os aird, & tainic remi d' indsaig
2616] a athar .i. Ioib, & roloig ina fhiadnaisi, & dabui ac
2617] iarraid fortachta dona Tiabandaib air, & is ed roraid: ‘Is olc a
2618] ndenaid,’ ar se, ‘a Ioib comorad catha i cend na Tiauanda & a
2619] tir do thogail forru, & doberi-siu do gach dei aili comairci in
2620] chiniuda is dual dó & ni thabraid damsa. Uair is i Simile, ingen
2621] rig na Tebi, mo mathair, & dafhetar is i Iunaind ilcrothach
2622] dobeir ortsu in aimleas arin fath sin.’

p.168


2623]

O 'tchualaigh {folio 33a} Ioib sin rotib a gin ngairi 'ma mac, &
2624] rothairbir poicc do, & adbert ris: ‘A mic,’ ar se, ‘ ni fich na
2625] ferg dobeir orum comorad in chatha-sa. Acht is ed ro-chindsead
2626] faidi & fisid o thus domuin co cuirfithea in cath
2627] croda-sa na Tebi. Et na bid ecla ortsu, a Baich, togail na Tebi
2628] don chur-sa, & amae dlestis a n-olc do denam, uair is adbul a
2629] n-ecoiri.’ Ba forbailid Baich dona scelaib sin.


2630]

A ndala-sum coruigi sin.


2631]

Dala, immorro, na Tiauanda, ranic techtairi tairisi da muntir
2632] co hEcliocles, co rig na Tebi, & roindis do rigrad na nGrec cona
2633] sluagaib & cona sochraitib i comfhocus do muigib tondglasa na
2634] Tebi. Ba truag immorro & ba tindesnach risna Tiauandaib, in
2635] gach inad a robadar, na scela aidbli sin do chloisteacht. Is
2636] andsin tra rothinoilit dochum Ethiocleis a sluaig & a sochraidi
2637] & a shuind chatha & a fhuird irgaili co faichthi fondglais a
2638] duin & a cathrach.


2639]

Tochestul & tinol na Tiabanda andso.


2640]

Et desid andsin cach drem degsluaig 'ma triath & 'ma
2641] thigerna do neoch thanic a hEonia & a hEobia & a Pótcis & a
2642] cathrachaib na Tiauanda ar cheana. Roergetar immorro, mna &
2643] macaim & mindaine, & rolinsadar muir na cathrach & dumacha
2644] aili airechtais ac fegad int shluaig sin.


2645]

Is and dono robui inn og ilchrothach .i. Antigone, deirbfiur
2646] Etiocles & Polinices, i tur roard romor sel o mur na cathrach sin
2647] amach. Uair is ed ba bes acusum gan sluaig & gan sochaidi da
2648] fhaiscin a n-ingen, no co faeitis re feraib. Et ba ler disi andsin
2649] tochim na sluag uaithi uar in faichthi, & ni ba ler daibsium
2650] isi. Et as e robi 'na farrad andsin Phorfas foirfi fireolach .i. fer
2651] grada a hathar & a sseanathar eseom, & a hoiti. Et rogob-si
2652] 'ga fhiarfaigi de: ‘Cia in sluag romor-sa iter?’ ar si, ‘&
2653] atchimsea,’ ar si, ‘ mergeda minglana Meinidceus corcargloin
2654] & airm croda Creoin coscraig.’ Rofhrecair, immorro, Porfas

p.170


2655] disi & is ed roraid: ‘In faicend tu and,’ ar se, ‘ Drías a
2656] tulchaib taebuara Tanacra atuaid on uarda & mili saegdech 'na
2657] farrad? Et in faicend tu ua do Nephtuin and & delb aeil ara
2658] armaib? Atat and sud i sochraidi Ethiocleis curaid na cathrach
2659] Ochalia, & milid mera Medona, & gaiscedaig nuaglana Nísa,
2660] & trenfhir thalchara Thispé agruin. Et is e is nesu doibsin
2661] Eurimedon croda coscorach mac Fanuuis, dea na caillted, & is
2662] e fhoires & airchises cach gabad coilled, & sluaig saidbri
2663] sonaidi Erithra maraen ris, & na sluaig tangadar a Colon ciuitas
2664] & a hEtanion agruin, & a hEleis ciuitas, & a Scíroin {folio 33b}
2665] agruin, & gae gera guinecha & sceith cruindi cabracha leo sin.
2666] Et ata and dono airechta Anchesta agruin do sil Nephtuin
2667] dei in mara & is e Neptuin garbas & fethnaiges in muir
2668] n-aduar n-ainfenach. Et atait and na fir bit a Megalis i
2669] cocrich na Greci & na Tiauanda & ba sruth Melais & ba thobar
2670] nGargais .i. tobar mirbulta, & ba sruth Alietis. Tamuin
2671] chruaidi chendtroma ba hairm daib sin, & craicind langarba
2672] leoman ba cathbairr 'ma cendaib, & cliatha cruaidi cranda ba
2673] sceith daib. Et atat aireachta slebe Elicona o sruth o Parmessus
2674] .i. sruth ata ac sliab Ailip i tuaiscert na Tiauanda & o
2675] sruth Armeus. Et ua cruitireda ceolbindi na curaid sin uili o
2676] na Moyisib .i. dei in bindisa.’


2677]

Et o raraid Porfas na briathra sin, & tuc na tuarascbala sin
2678] arna sluagaib, rolobair Antigone, & is ed roraid: ‘Is mor am,’
2679] ar si, ‘cosmailius na desi sin derbrathar ut adciam uaind
2680] iter na sluagaib; uair is at caema comarda iter arm & etach.
2681] Et ropad maith lim,’ ar si, ‘da mad it e adam derbrathair
2682] fein dobeth in cumand ut.’ ‘A ingen am,’ ar Porfas, ‘ni
2683] tusu cetduine roraid sin riu, uair is sochaide adubart riu

p.172


2684] connod brathair iad cen go bed. Uair is e a athair in dara fir
2685] dib araili, & as amlaid doronad sin: Nipe bean do Laiftecdaib
2686] rochomruic re maccaem n-og .i. Lapitus a ainm, & nir-comraic
2687] re mnai riam roimi, & do na tainic d' aes a denam. Et ba
2688] hingnam comperta di, & darala Alatrius di don toirrches sin, &
2689] o ratuismed in mac sin ba gairit coma comor comdelba re
2690] athair he. Et as iad in dias ud romothaigis-siu, in mac sin,
2691] & int athair .i. Lafitus & Altrius a mac & tri chet marcach
2692] sochraidi cach fhir dib isin tinol-sa a Clissanta & a Coriona.
2693] Ata dono and Ipseius mac Assopas ri thuathtuaiscert na
2694] Tiabanda, & carpat caem ceith irriada fae, & sciath suairc
2695] sarcengailti do sechedaib glaeta gloleathair ara muin, & luireach
2696] trebraid trefhillti 'ma corp, & gae remur rofhata do na tabair
2697] urchur d'imroll ina laim. Et ata sochraidi mor maraen
2698] ris sin do neoch thanic a hIton & a hAcamena a Midae
2699] fesand mor & a hAulis a Grea & a Plathea & a hAndtegon
2700] & mill lanmora luaidi rodibraicdis a tulaib trenamais na fir sin
2701] & nim tualaing-sea tra,’ ar se, ‘aireom ina tanic sund do slogaib
2702] athloma examla a hilchathrachaib na Tiauanda aróen re
2703] hIpitus n-arnaid n-aduathmar mac Naupulus .i. urri na cathrach
2704] medonda na Tiauanda. {folio 34a} Et imscith mo roisc, &
2705] rocomleath ceo crini thairsib ac tuream na slog, & nim tualaing
2706] a n-indsin ni as mo, a ingen,’ ar se.


2707]

Asa haithli sin roerig Ethiocles, rig na Tebi, ar mur a
2708] chathrach d' acallaim a sluaig & a sochraidi, & is ed roraid riu:
2709] ‘A rigu maithi mormenmnacha,’ ar se, ‘ni misi tendas na
2710] tindesnaiges sib dochum in chathaigthi-sea, acht bar mbaid &
2711] bar mbeodacht fen, & bidam cubaid-sea dono lib ac cosnum
2712] uar cathrach & uar tiri.’ Et is amlaid robui 'ga rad sin, & tuc

p.174


2713] achmosana imda da brathair .i. do Polinices, mar nabeth ina
2714] fiadnaisi, & roordaich lucht a cometa ac din & ac diten na
2715] cathrach & ac gabail in muir. Roordaich curadu croda re
2716] cathugud inn agaid gaiscedach Grec amuich an-echtair.


2717]

Dala na Tiauannda conigi sin.


2718]

Dala immorro na nGrecs rochomergedar reompo can suan
2719] can sadaili i llo na a n-aidchi. Et ger-ua imda derbairdeda
2720] doirrthi & figrad firuilc daib, ni rothoirmisc iad, & fa moidi
2721] fich fergi na firloech gach celmaine condtrachta dachuiread
2722] daib, no go rangadar co sruth siralaind sribuaine Assopus i tir
2723] na Tiauannda. Roansad-sum gan dul tairis sin fo chetoir, uair
2724] ba hadbul a thuili & a thondgar int shrotha inn uair sin ar cur
2725] breachta druad do Baich fair .i. do dea inn fhina. Is andsin
2726] tanic Ipamedon feochair fergach, & rogres a eochu isin n-ath
2727] resna sluagaib, & roraid riu: ‘Is metacht & is midlochus daib,
2728] a fhiru,’ ar se, ‘gan dul dar in sruth, & ni bud maith do
2729] thogail na Tebi trenarmaigi a triall amlaid sin.’ Roergedarsum
2730] co dian denmnedach lasin ngresacht sin, & dachuadar dar
2731] in sruth, no co rangadar co tulaich taebalaind taitnemaich, &
2732] rochidis-sium uaithib asin tulaig sin tigi arda airegda &
2733] faicheda fondglasa firailli na Tebi togaidi. Rogabad leosum
2734] andsin longphort lethan lanadbal, & robadar and re head na
2735] haidchi sin.


2736]

Ua doilig tra a fhis & a haisnes crith & comegla, sestan
2737] & sirsibul na Tianannda isinn aidchi sin, o 'tchondcadar pupuill
2738] aladbreca fhairsingi, & airm saiti sesmacha gaiscedach nGrec
2739] re doirrsib a mbrecpupall ar ngabail a longphuirt doib. Robui
2740] tra do met a n-ecla na ba' tairisi leo din na daingen da roibi
2741] accu isinn aidchi sin. Cid tra acht roscailid badba buaidirthi
2742] belderga, & demna aduathmara ifirn ua cheachtar in da sluag

p.176


2743] isinn aidchi sin do commorad uilc & anindi chaich dib re
2744] chele {folio 34b}.


2745]

O raergedar tra renna roglana roailli in lae arnamarach,
2746] roerig Iochasta, in rigan laimgel gruadsolus .i. mathair
2747] Ethiocleis, rig na Teibi, & Poliniceis, fhirthogla na cathrach,
2748] & a da hingin maraen ria .i. Ismine & Ántigone. Ba foraesta
2749] forbthi am in rigan thanic andsin, & o rasiacht ar larmedon
2750] in longphuirt, tuc a faidi fergacha firguil os aird, & roraid: ‘A
2751] rigraid Grec,’ ar si, ‘cait a fuil mo mac-sa i trasta andso .i.
2752] Polinices?’ O 'tchualaich immorro in gilla a beith-si 'ga iarraid
2753] amlaid sin, tanic da hindsaigid, & robui 'ga cendsugud do
2754] briathraib suarca sithamla. Rofhrecair-si dosum, & is ed
2755] roraid ris: ‘ A mic,’ ar si, ‘is ead is maith lim sith suthain do
2756] bith etorrud-su & do brathair, & fiarchairi chairdisa re
2757] Tiauandaib; & tair limsa anund isin Teib, & dena sith ret
2758] brathair, & cuindig rigi da deoin air, & mina thuca dit i,
2759] is coraidi dit cathugud croda 'na agaid.’ Tanic tra cridi na
2760] nGrec co mor andsin ar Iochasta, amal robui ac eterdeligud a
2761] mic on chathugud Tiauanda.


2762]

Rotriall tra Polinices dul le-si isin baili, & nir-thairmisc
2763] Adraist imi a dul, cein co tanic Tit mac Oeniusa & co n-ebairt:
2764] ‘Na dentar in sid,’ ar se, ‘no co tarar-sa arna
2765] Tiauandaib crechta mo chnis & mo chuirp,’ & rothocaib a
2766] chrechta & a ilgona dona sluagaib andsin. Rothairmisc tra in
2767] scel sin fa Polinices dul isin cathraig & gan sid re brathair,
2768] & rolinsad na Greic uili o feargaib glemorgarba risna Tiauandaib,
2769] o 'dchondcadar crechta & ilgona Thid.


2770]

Is i sin aes & uair tangadar amach na tigri robitis ac imarchur
2771] charbaid Baich mic Ioib d'ol uisci co srothaib firuara firglana
2772] na Tebi; & in am dochuadar, dorala doib ara Ampiamrauis int

p.178


2773] sacairt moir Grecaig, & se ac lecun usci da echaib. Rolingestar
2774] air na tigri diana dasachtacha fo chetoir .i. cenela anmidead
2775] erchoideacha marbas cethra & daine na tigri, & romarbsad
2776] fo chetoir int ara & na heochu, & romarbsad dono dias aili do
2777] Grecaib .i. Idas & Athamant a n-anmanda. Et asa haithli
2778] sin adchondairc Acondteus Arcadecda na tigri .i. taiseach
2779] morthuaithi do lucht na hArcaidi, & is 'na fherand ata in cloch
2780] bis ar lassad trebithu .i. Sifist a hainm, a haithli na n-echt
2781] sin do denam daib. Et rodibraic {folio 35a} da saigid a ndiaid
2782] aroili da n-indsaigi co rotregdastair a craideada & co rucsad na
2783] soigti leo isin mbaile & conid thall fuaridar bas. Ba trom &
2784] ba torrsech re Tiauandaib in gnim sin, & roerig amach fer do
2785] muntir Baich da ndigail .i. Flegius a ainm, & rosiacht cen fhis,
2786] no co tuc bem claideb do Accondteus co torchair marb cen
2787] anmain. Roergedar immorro na hArcaidi da digail sin, & ni
2788] riacht leo, uair ranic Flegius imslan isin cathraig ar ndigail
2789] enig Baich amuich.


2790]

A haithli in gnima sin, immorro, roas seastan & seselb adbulmor
2791] i llongphort lanlethan na nGrec, & roraid Tit, mac Oenius,
2792] re hIochasta, & re hingenaib: ‘Denaid imthecht,’ ar se, ‘& ni
2793] berthai sid na osud lib don chur-sa.’ Roimthig Iochasta
2794] co dubach domenmach ar sin ar femed sida iter a macaib. Roerig
2795] immorro Tid in milid croda coscoroch calma mac Oenius,
2796] & rogab a armu, & rocomgres a munter & slog na nGrec ar-chena.
2797] Dorindead tra andsin comergi croda curata & sitharchar
2798] tindisnach cur-ua cumascda combuaidirthi iter chairpthib &
2799] curadaib in longphuirt isinn uair sin. Et robui da deni
2800] roergedar connar-leced tosach na toisigeacht da stocaib croda
2801] cathaigthi na da mergedaib suarca srollaigi acht a ndirmanda

p.180


2802] diana daescurshluaig & a ngeraiti gaiscid ac imchosnam gliad
2803] & ag iarraid irgaili dochum na Tiauanda.


2804]

Roergedar immorro da frestal & da frithaileam trenfhir
2805] tenda tairgsenacha talchara na Tebi, & rogob gach triath & gach
2806] tigerna dib ac gresacht & ar nertad a mormuntiri. Is andsin
2807] tra rotrenindsaich cach aroile dib co ma samalta gredon
2808] & glorbresmaidm na mbuiden mbodba mbuaidirthi sin ac
2809] comrith ri aroili amal bad i ind fhidbad bresbraenach billeach
2810] barrglas rothuited i ladraib glac & i llamaib aroili re gaidsnim
2811] na gaithi garbfuairi gemreta, no mar bad he in la bratha
2812] brigurduirc brecdhuileach tisad do smurchaicilt in betha,
2813] & robris cach airech & gach airdri bernd rena buidin i cath
2814] aroili an uair sin. Et mar dabadar isin comfheidm catha sin
2815] na sluaig ceachtarda, is and rofuataig a each rot romer trenfer
2816] do Tiauandaib le i cath na nGrec .i. Terelas. Et rofrithail
2817] Tid mac Oenius he, & tuc fuirmed fedma co setrech sirchalma
2818] do gae robui 'na laim air, cor-ua bir bodba trena chorp don
2819] churaid, & rouc a ech aris ar cula e, cor-ap and rothoit gan
2820] anmain iter na Tiauannda. Rotrenindsaig tra na catha croda
2821] araili ar toitim an fhir sin co fergach firamnas {folio 35b}, &
2822] rodluthaiged in chathirgal comrumach cor-ba dluithither re
2823] cleith lenad arna landluthud in lini sleg semnech sithfhata
2824] rosuidiged a sleasaib suarca saercland sochenelach andsin isin
2825] tres trenadbul sin rochuirsetar. Cid tra acht rodithaigit dronga de
2826] sin, & romaeltamnaigit meidi, & robanaid gnuisi, & roruamnaigit
2827] roisc, & roclaeit cetfada curad ac comthoitim. Et ar sin dorala
2828] in cath ina comracaib. Rocomraic and Ipamedon ard allata
2829] do Grecaib & Siuaris siruallach do Thiauandaib; & i forcindiud
2830] in comraic sin, darochair Siuaris and do laim in Grecaig.

p.182


2831] Rocomraicsedar asa haithli sin da trenfer do Tiauandaib .i.
2832] Pilius & Perefans re hengaiscedaig do Grecaib .i. Menceius &
2833] dothoitsed na Tiauanda don tachur sin, & ruc Menceius a
2834] coscor & a comaidem. Acus dorigne Partapeus ri na hArcaide
2835] ar sin echta ar na Tiauanda, & rothoit in triur-sa dib les .i.
2836] Ithis & Sibaris & Perefans. Dothoit Cunesius gaisgedach do
2837] Grecaib re hEmon echtach mac Creoin do Tiauandaib; & ac
2838] toitim do, rogab Abas do Tiabandaib airm inn fhir sin,
2839] & rofocair comruc da eis; & tarlaic fer do Grecaib saigit do, co
2840] rus-facaib gan anmain.


2841]

Roerig ar sin sacart do muntir Baich .i. Euneius, & a edach
2842] delradach dathalaind imi asa ndenad idbarta do Baich; & tuc
2843] tainsem & tarcaisi mor arna Grecaib uili, & is ed roraid: ‘Na
2844] cuirid risna Tiabandaib, a Grecu,’ ar se, ‘uair is croda a curaid
2845] & is cumachta a ndei & is daingin muir a morcathrach.’ Et o
2846] 'dchualaig, immorro, in ri londmer gaisceadmer do Grecaib
2847] .i. Capaneus, rofhrithail he, & tanic ar cind conairi do inna
2848] stuaig agmair aduathmair, & roboccbertaich in sleig rindger
2849] rofada co crund caem comdiriuch do fid chuanda cuibrisc
2850] indti, & roraid: ‘Is baeth banda,’ ar se, ‘na briathra bocasaich
2851] raidi risna slogaib. Et dursan nach e in dei da n-adraid ita id
2852] richt adrasta: uair da mad he, rofaethsad limsa.’ Et is
2853] cuma roraid-seom sin & tuc urchar n-indill diruch dochum
2854] Euneiuis, co roscailt a sciath. & co robris a druim, co riacht a
2855] marb dochum talman ua chetoir.


2856]

Is andsin rofhopair Ethiocles ri na Tiabanda ara & ilechta
2857] aidbli ar gasradaib Grec co ma dronga dianmarba les iad cach
2858] conair ina teged. Polinices immorro tuc sec accarda & anucul
2859] dona Tiabandaib arin fialchairi mbunaid & ar grad na hatharrda
2860] dilisi duthaig.

p.184


2861]

Is andsin rofobair Ampiaraus int uasalsacart do Grecaib
2862] calma do denum {folio 36a}, & rogres a eochu ana athloma co talchar
2863] tindisnach coma luaithred lanmin in roe croda comraic da eis
2864] cach conair concinget in cairpthech sin. Et ba delradach
2865] dathalaind isinn uair sin amail renna rosollsi taitnem a
2866] cathbairr caim cumaidi & a sceith cuanda capradaig iter
2867] na cathaib ceachtarda, & imasae fa na sluagaib comma tregdaithi
2868] toitmithi trenfhir tenda Thiabanda fo armaib cach conair ina
2869] slaiged in sluag. Et is andsin rocomraic dosum ar lar in chatha
2870] & Flegias feochair firgarg do Tiabandaib, & rochuirset comlond
2871] croda curata re hed & re hathaig, co rocreachtnaig cach aroili
2872] dib; & i forciund in comruic dorochair Flegias do laim ind
2873] arsid Ampiarauis. Doriacht ar sin chuici fer dian diumsach aili
2874] do Thiabandaib .i. Pileius, & rochuirset na curaid cruaidirgal
2875] eturru, & rothoit in Tiabanda don gleo sin.


2876]

Asa haithli sin robeansad ris in dana curaid croda comromacha
2877] don chiniud cetna .i. Cromis & Emetá; & rofuaibredar
2878] ar sin Ampiaraus co hainmin & co hacarb. Acht ceana ba daibsium
2879] tiugbas tiugba in tachair sin, uair rothoitsed do
2880] gonaib amainse aicbeli Ampiarauis. Atchondcadar sin triar
2881] talchar trenfher do Tiabandaib. Roluathindsaigsed ar Ampiaraus
2882] do digail na sarecht sin air .i. Ipinorus & Ságis & Giian
2883] glondmer gaiscedach. Et frecrais & frithailis int arnaid Ampiaraus
2884] iat o brathbuillib mera mileta comtis fadba fiarletairthe
2885] cuirp chaema chnesgela na curad comramach ua chrolindtib
2886] fola fichithi forruaidi da eis. Et ar na toitim leis, rofobair
2887] Alchatous Tiabanda a n-irgail air, & rofhrithail-sium he, & tarraid
2888] cloich cruaid comamais, & tarlaic urchur do Alchatonus,
2889] cor-bean i cleithi i cendmullaig, co torcair can anmain.

p.186


2890]

Adchondairc ri sotal sarechtach do Tiauandaib int echt sin
2891] .i. Ipseus mac Assapos, & ba trom & ba trengalar les na hára
2892] acgarba aidbli dorad Ampiaraus ar na slogaib, & nir-ael fulang
2893] do gan a digail air, gen gor-thais da eneoch amal robui fen ac
2894] slaigi gasraidi Grec. Et o rocomraicedar in da curaid croda
2895] sin, rogab cach dib ac tarcasni & ac tomaithium uar aroili.
2896] O 'dchondairc tra Apaill dea na faistine sin, tuc urchar da ga
2897] don araid robui i carbat Ampiarauis .i. Alegmon, co rothoit gan
2898] anmain asa carbud amach, & tanic fen 'na inad, & rogob deilb
2899] inn arad fair, & ruc les na {folio 36b} heocha & in carpad ar imgabail
2900] Ipseuis. Et robui Apaill andsin ac setugud carpait Ampiarauis,
2901] & ac dirgud a urchur, & ac certugud a ech, cona tabrad in fer sin
2902] fasbuilli no urchur cen amus. Rodidned dono he cona echaib ar
2903] urcharaib aicbeli a bidbad. Is andsin roiadsat in cethrar
2904] curad-sa do Tiabandaib im Ampiaraus .i. in cosidi mer mordalach
2905] Meneleus, & in marcach ard allata Antipus, & int arsich engnuma
2906] Accíon, & in laech londmer Lapus. Rocomgres Apaill eochu
2907] Ampiarauis i cend na curad sin co dian & co dasachtach, & roimir
2908] cles carpait furru, con torchradar ua chosaib na n-ech, co
2909] nderna comach & combrud da cnamaib fa chorraib in charbaid,
2910] & co fuaridar bas. Cid tra acht ba tairmesc erma & imtechta
2911] dona hechaib sin Ampiarauis, co na roictis a cosa comgabail in
2912] talman re himad na corp cnesgel curad letarthi & na sleg
2913] sesmach sirshaiti a sechnachaib na saerchland cor-ba comderg
2914] uili a eich & a charpat o braenaib fola falcmara forruaidi i taebaib
2915] trenmilead togaidi.


2916]

Roben immorro Apaill andsin a deilb ndruidechta de, & dachuaid
2917] 'na richt fen, & rolobair re hAmpiaraus, & is ed roraid:
2918] ‘Is i seo,’ ar se, ‘crich & cindiud do shaegail, & ni edaim-sea
2919] t' imdegail ni as sia, & merdait do scela & do chlu co forcend
2920] saegail & co deread n-aimsiri, & erig i muigib aduathmara ifirn,

p.188


2921] amal rocinded dit; uair is ferr duid ina beth can adbaid
2922] n-adnocail i tir na Tebi togaidi.’ Rofhrecair Ampiaraus
2923] do-sum, & is ed roraid: ‘A uasail, a Apaill,’ ar se, ‘ roairigis tu
2924] isin carpud im arrad, & is fir a n-abraid; uair adcluinim-sea
2925] fen srotha granna garbfuara ifirn ara trethan & ara tondgail
2926] acim iarraid, & adcluinim dono Cerber craessoslaici, cu Oirc,
2927] doirrseoir imnedach ifirn, acom amastraig & aeom gairm, &
2928] ber-siu let na coroni coserctha atat 'mam chend, uair ni dlegar
2929] a mbreth a n-ifirn.’ Roerich immorro Apaill uad-sum asa
2930] haithli sin, & rofhacaib e, & o dachuaid uad, tuc Ampiaraus
2931] a chnedchurad os aird re hecla ind etualaing.


2932]

Et is andsin tanic trethan & talamchumscugud mor isin
2933] talmain a rabadar, co roerig a luaithred & a langainem cor-ua
2934] ceo comdluith cumascda i timchell na sluag. Et rocomerig
2935] torand tren mortolgach ar sin co rochuibrig & co rochengail na
2936] catha ceachtarda nar-ba tualaing {folio 37a} duine dib ursclaigi
2937] na himbualad isinn uair sin, acht rouadar 'na sesam & cranda a
2938] sleg cosaiti re n-ochtaib. Et o rabadar-som amlaid sin co tai
2939] tostach re hecla in bresmadmanda bratha buaidirthe, adchualadar
2940] rodianscailed in talman in tan sin, comma hall firdomuin
2941] fudomanta forba na faichthi fondglaisi ara rabadar, & rooslaic
2942] in talam & rosluic Ampiaraus trenadbal cona armaib & cona erred
2943] & cona echaib & cona charpad, no co ranic co hichtur ifirn
2944] n-aduair cen cheim ar cula.

p.190