Corpus of Electronic Texts Edition
Togail na Tebe (Author: Unknown)

book 3


1046]

Imthusa Beniri banchumachtaigi roinnsaigh seig a lennan
1047] .i. Mairt, mac Ioib, & roeigh air, acc iarraidh furtachta do
1048] Tiabandaib. Ocus dofurail ar Tit dul co Teibh do fagbail
1049] a oidhedha, & roraidh ris: ‘Da madh e intan tucais in gradh
1050] ndermair dam-sa, & mé ac Ulcan, & rochuadhus ad chomdail-si
1051] & rochomracais rim ri Beínir.’ Et o racomraic
1052] Mairt ré Ueínir andsin, rochruaid-cheangail an slabrad sin iad
1053] a n-urd a n-adaltrais, & o'dchondaircc Ulcan iad, rothinoil na
1054] huili dee & bandee co fhacadar co fiadnach adaltras na deisi
1055] sin. ‘Et da mad hé an lá fuarus-sa ant imdergad-sa as do
1056] los-so, a Mairt, dobertha-sa maithim damsa dona Tiabandaib;
1057] & is mo doberad Ulcan damsa cach ní do chuingebaind fair
1058] anai-siu, a Mairt, gé doronas a aimles. Et créd mar-leigis
1059] dam,’ ar si, 'in ingen rucus duitsi dar cend Ulcain .i.
1060] Erimone da thabairt don fir Thirdha Tiabanda .i. do
1061] Chaitheam mac Aigenoir, & olc do denam ré lucht na Tebi 'na
1062] degaid? Et is nair duitsi,' ar si, 'corob treisi Ulcan re
1063] milliud na Tiabanda ina duitsi 'ca n-anacul. Uair is é Ulcan
1064] tre ét umaitsiu tuc forru cach col da ndernatis .i. in muintorc
1065] tuc doibh' Nochar-fuilngastair trá an fer cuanda
1066] cathbuadach sin .i. Mairt, mac Ioif, briathra Ueiniri do dul
1067] co dimain. Rachuir a arma uadh, & ratoirling asa charpud,
1068] & ragab chuigi in ingin a crislacha a sceith, & dogab co hinmain
1069] ailgen age hagallaim, & adbert:

p.68


1070]

‘Is tu duine as docha lium dona dainib & dona deib. Is
1071] taisgi {folio 13b} rabaithfind-si me fein isna srothaib adfuaraib
1072] ifernda na dorachad do grad-sa & t' inmaine uaim-si & grad
1073] lochta na Teibi. Et chena,’ ar se, ‘ní fhedaim gan teachtaireacht
1074] don athair d' Ioib,’ ar se, ‘uair atá a chumachta a
1075] nim & a talmain, ar muir & ar tír, & ní fetar teacht a n-agaid
1076] chainti an chumachtaigh sin. Uair docindastar Ioib & na dee ar
1077] chena o thosach an domain an cath-sa do chur. Acht chena,’
1078] ar se, ‘an tan beidid na cineada ceachtarda ac cathugud ar
1079] faithchí na Teibi .i. na Greig & na Tiabanda, & dober-sa
1080] fortacht & foirithín ar na cineadaib tairisi Tiabanda, & dodensa,’
1081] ar se, ‘do comairli-si cach indus dofédab. Uair legaid
1082] na dee dunn furtacht ar carad, acht na rab toidecht a n-agaid
1083] a toili.’ Et o adubairt-sium sin, rogreseastair a eocha disciri
1084] difoillsigtheacha. Ba deínigtir saignen luath lasamain ré tinchur
1085] a diubraicthi a n-aimsir adfuair anbhthenaigh, amal tainig
1086] Mairt mac Ioip roime risin teachtairecht sin.


1087]

Imtusa Mairt conuigi sin.


1088]

Imtusa, immorro, Tit mic Aeniasa, rochind seig a cheim co
1089] hegandais adhuathmar tarsna bruigib cairgeacha gartglana
1090] Gregda, co facaid uad mullach na cathrach suaithinti suthaigi
1091] .i. Prochinna. Ua salcha sesmacha trillsi an treinfhir an tan
1092] sin ré lansalchar an luaithridh a haithli an lanchomaig, & ba
1093] salcha fliucha na fiarletairthi badar a cnís an curadh sin tré
1094] allus a aistir & imtheachta, & ba ruisti ruamanta ruisc an rig
1095] sin can codlad can chumsanadh, & ba mórmenmnach an milid
1096] sin a haithli an choscair dochuir. Uair is amlaid dobai Tit
1097] mac Aeniasa andsin amal tarb comthnuthach coscarach ar
1098] traethad & ar toirnem chuingida choimfedma, coma lochairthi
1099] lanmarb dá eis arna fudbogud. Et o rasiacht immorro Tit na
1100] cathracha sin na Greigi, nir-an ag adandadh feirgi & urbaga
1101] & miscaisi na Tiabanda arna cineadaib cosnamacha.i. ota Sefon

p.70


1102] co hArgus, & dobaí 'ga indisi a chuir fein re teachtairecht
1103] dochum Eitiocleis d' iarraid a fhlaithis do Phoilinices & raindis
1104] an feall dotriallad air fein tré cheilg in aidchi sin ag Eitiocles
1105] & era do thabairt do umon flaithus do Poilinixes. Et dob
1106] urusa do Thid aslach uilc do thabairt iter na poiplib sin
1107] Adraist. Uair dobai an dea croda cathchumachtach .i. Mairt
1108] ag urail ana cetna orro.


1109]

Is andsin immorro dobaí an rí uasal Adraisd, & maithi a
1110] muinntire 'na farrad a coindi & a comairli, antan tainig Tit
1111] can fis can aireachad chucu no cor-labair fon dorus ag teacht
1112] astech: ‘A firu,’ ar se, ‘gabaid bar n-arma co hoband; &, a
1113] Adraist,’ ar se, ‘cuimnig,’ ar se, ‘do sochineilchi & mormenma
1114] na fer mor or-geinis, & gab t' errad catha & comlaind & comraig
1115] umat; uair nocha n-uil comall caradraid ag na Tiabandaib
1116] risna deib na risna dainib,’ ar se, ‘& dobad usa liumsa dul re
1117] teachtaireacht d' indsaighid cach cineada egendais ainindaig
1118] aili 'sin doman na da n-indsaigid-sium. Et a Gregu,’ ar se,
1119] ‘berid mise dochum catha na Tiabanda, co ndiglar orra
1120] t-indlead ceilgi tucsad oram isin n-aidchi. Et ergid co hoband,’
1121] ar se, ‘dochum bar namad antan ataid co heaglach anband
1122] remaib, & antan ataid trúaig nemelach ag nuallguba a
1123] muinntire, & ag adnacal chorp a carad alla muich da cathraig,
1124] & domarbus-sa fein .i. treinfer dona Tiabandaib. Et gid am
1125] creachtach crolindteach-sa, is ed is ail lium a n-indsaigid a
1126] cetoir doridisi.’


1127]

Is andsin doeirgeadar na Greig a n-aenfecht a n-agaid Tit
1128] do ferthain fhailti fris, & is e cetfer doriacht da indsaigid an
1129] trenfer calma Caithmeagda Polinixes, mac Eidiph, rochrom a
1130] chend, & adubairt: ‘Adchim-si do chreachta, a Thid {folio 14a}
1131] croda, a charagain; & ni tu do creachtnaiged andsin,’ ar se,
1132] ‘acht mad misi fein; & do rulcaib rimsa doronad ritsu sin.
1133] Et bid-si an bar tocht,’ ar se, ‘a Gregu, & leigid damsa debaid
1134] ma brathar; & is ed dligim-si, a Thid,’ ar se, ‘do creachta-su

p.72


1135] do digail ar na Tiabanda.’ Et o dorigni-sium an comairli sin
1136] co coitchend re cach, roerig truaignemela toirrsi & tindusa a
1137] crideadaib na nGreg uili, co na roibi d' óg na do shin andsin
1138] an aenduine nar-chind aenmenmain a aít & atharda d'fhagbail,
1139] & dul d' indsaigid na Teibe da togail re Polinices, mac Eidip.
1140] Et dolabair an comairleach cianaesta .i. athair an oireachais
1141] .i. Adraist, & adubairt: ‘Leigid damsa & dona deib bar caingni
1142] do chrichnachadh, & denaid teindeanus um thachur risna
1143] Tiabandaib. Uair nocha racha an flaithius a n-aiscidh o
1144] Phoilinices can a digail, & bid nua sin antan dogentar. Acht
1145] chena,’ ar se, ‘dentar Tit, mac Aeniasa, do leiges & do
1146] lesubugud, & legar codlad & cumsanad do chorp creachtach
1147] an curad comba slan.’ O 'dconncadar ceitheirn cuanna
1148] coimideachta Thid & a baincheili baillgeal banamail, a cnes
1149] ar creachtnubad, robuaidrid & romedraid a menmanda. Et
1150] roiadsadar uili uime 'ma cuairt co dluith & co daingean,
1151] & tairastair Tid co fosaid forbailid isin rigda, & a druim
1152] risin colamain comdáingin bai for lar an tigi, & doglanustáir
1153] an fiseacda fireolach .i. Idmon Epidurda, a creachta an curad
1154] sin d' uisqui langlan linnfhuar, & dothesc do scín aithgher
1155] faebarguirm iumad an feola atmairi as. Rachuir luibi
1156] cumachtacha cnesaigthi a ledarthaib an laeich sin. Et dobai
1157] immorro Tid, mac Aeniasa, ag fhaisneis & ag indisin a gloir
1158] & a chomraith fein & Eitiocles, rí na Teibi; & roindis an t-inad
1159] a tugadh in tsleag ceilgi uime, & in uair tugadh an cath,
1160] & anmand na toiseach dorochair leis, & an fer-indisin-scel
1161] doleig da deoin uada .i. Meón fileata fadamail. Et ralai socht
1162] & snim an rig n-uasal nAdraist & airig an tiri & an talman
1163] badar ag eisteacht risna scelaib sin; & rob adannad menman
1164] don lucht sin scela na Tiabanda, & fá togbail fergi & fhuasaidi
1165] Poilinices moir mic Eidip sin.

p.74


1166]

Et asa haili sin rothoirind & rathain an grian dathglan
1167] difhoillsigtheach ar uaitni caema corcurglana dar eocharbordaib
1168] in aigeoin aird Iberda siar co fuinead, co raiad
1169] & co rainfhogair agaid dorcha doimtheachta crislach comluaimneach
1170] choguasta na firmaiminti um tulcaib & trebaib an
1171] talman uile, co roibi cach uili ina colladh & ina comsonad,
1172] acht mad an ri cendais cianaesta Adraist a cliamain primda
1173] Polinices ag sgrudad gaisi can chodladh in aidchi sin. Et bai
1174] immorro Tid leadarthi ina lanchodlad.


1175]

Et asa haithli sin tainig Mairt mac Eoiph con arm-fogrugad
1176] adbal in aidchi sin dar crichaib arda na hArcaidi, & dar bruigib
1177] níamglana Neim, & dar mullach sleibi tirmglain Tenair & co
1178] cathraig uasail Apaill do Tiramnas co ralin grada chatha
1179] cosnama crideada crithnaigtheacha curada na Greige uile tré
1180] aslach an dei Mairt mic Eoip. Et dono roscail Fama, ingen
1181] Terra, co cluach irdairc scela an dea sin Mairt fo chricha
1182] & chendacha na Greigi uili.


1183]

Et a cind seacht laithi iar sin roerig an senoir snimach uasal,
1184] Adraist, & rabai co himsnimach 'ca imradh an cath rocomorfad
1185] no an sid rosirfea ar cach. Et is í comairli rochind-sium a
1186] faidhi & a fisidi do thabairt da indsaigi & a iarraid daib
1187] seig tre idbartaib ar na deib cid bud {folio 14b} choir dona
1188] Gregaib do denam. Et is íad fá fileada an tan sin aigi-sium
1189] .i. Aimpiaraus, mac Eitiocleis no Eiclis, an sagart tuaithcill
1190] tuigsenach na todochaidi; & an senoir fireolach finnitneach
1191] Melampus, mac Amithón. Et ni roibi a coimré fris neach as
1192] mó ara tabradh Apaill firinde fregra inain fer fer sin Melampus.
1193] Et doronsad na faidi sin taiscelta faistine ar tus tré fuil & tre
1194] indib na ceathra comloiscthi; & ona fuaradar fis, ba failid leó
1195] uaithib sin.


1196]

Is andsin rotriallsatar taisceladh ar nellaib nuaglana in aeoir.
1197] Is amlaid rabadar-som, & sliab ard aireda chuanda coimreidh

p.76


1198] coiseargtha a comfogus doib .i. Aphesannt. Et is do mullach
1199] an sleibi sin rofoluaimnig Peirs mac Ioip do cathugud risin
1200] Gorgain. Et is amlaid robai an Gorgain sin .i. torathar trechendach,
1201] & cach duine adchid he, doníth carraig chomdaingean
1202] de. Et o chualaid Pers, mac Eoiph, sin, tainig d' indsaigid
1203] Meneirbi, & dosir furtacht furri dochum na Gorgaine. Tug
1204] Menearba a sciath gloinidhi udein dó co faicead-som scath
1205] an torathair ag tachur ris trésan sciath sin & co faced in
1206] torathar a scath fen conar air fen docuaid ann; & atorchair
1207] an Gorgan leis-sium amlaid sin. Is andsin tangadar na faidi
1208] & na fisidi sagart sin .i. Ampiaraus, & Melampus isin sliab
1209] n-alaind n-olachranda sin, & a snaitheadha ailli idbarta 'má,
1210] cendaib re turggabail na greine suaithinte solusta isin maidin
1211] moch-thrath. Is andsin dolabair Ampiaraus ar tus risna deib
1212] .i. re hEoib do sundrad, & rarim a cumachta egsamail in gach
1213] inad fair d' iarraid a firindi & a innisin duind ‘tre gothaib,
1214] na n-én, a Ioib, an mberam coscur dona Tiabandaib don
1215] turus-sa.’ Et o 'dubairt Ampiaraus sin, ralaigastair isin
1216] carraig chomdaingin a roibi, & dobaí ag fegad fhaistine ina
1217] aignead andsin, & o rafegastar-sum renda & reltanda na firmaiminti
1218] & atha in aeoir, ralabair Melampus an filid asa haithli
1219] sin &: ‘Adchi-si, a Ampiarauis,’ ar se, ‘conach foillsigend én
1220] na eathaidi sosad na saime don ulad sin no so. Uair adchi-si
1221] edaigi duba duaibsecha in aieoir ag troid & ag tachar da
1222] n-íningnib croma gcruaidgera ré ceili & comartha duba & broin
1223] sin,’ ar se. Adubairt Ampiaraus ar sin: ‘Darignius-sa co minic,
1224] a Melampuis, faistine a n-uair dob óg me antan dochuadus a
1225] nArgo maraen ré hIason & ré hErcail & re rigraid Greg archena
1226] co crich na Colcheta. Et ní rochreid Iason da fisid na da
1227] fireolach .i. do Mopsus, amal dochreid damsa. Et nocha nfuarus
1228] riam,’ ar se, ‘derbairdeada moruilc mar so a faistine da ndernus,
1229] & tabair-si t' airi, a Melampuis,’ ar se, ‘risna dirmaib diairmidi

p.78


1230] d' elaib ailli aengela adchím atuaid on sruth adfhuar oigreta .i.
1231] o Strimon seachum aneas o sruth niamglan Nil. Et tuic
1232] let,’ ar se, ‘na Tiabanda taetencha i sidh in cathrachaib
1233] comdaingnib trésna helaib nemluaimneacha,’ ar se, ‘& ag
1234] siud buidean as chalma inaid fein da n-indsaigid .i. secht
1235] n-aquili aduathmara, & is íad sin,’ ar se, ‘secht rig na nGreg
1236] ag indreadh & ag argain na Tiabanda. Et ag siud,’ ar se,
1237] ‘aquil dib ag dul a n-airdi co raloisceadh & co raloitteadh hí;
1238] & is é sin,’ ar se, ‘an ri diumsach drochaigentach .i. Capeneus
1239] an sechtmad ri do rigaib Greg. Loiscfid saignen teindtigi hé
1240] ar an cathuchad mór na Teibi. Et dofhédar,’ ar se, ‘in aquil
1241] so rothuit ar scis eteagaili, is é an mac baeth buaidealta
1242] Partanapeus, & ant en-sa dono rothuit ar braigid a cheli
1243] Polinices mor, mac Eidip sin; & a brathair Eitiocles, rí na
1244] Tiabanda. Et ann acil {folio 15a} raimig imshlán .i. Adraist uasal
1245] a aenur. Et ant én so adchí do bathadh,’ ar se, ‘.i. Ipimedón,
1246] & ant en-sa adchí ac cognam chind aroili .i. Tid mac Aeniusa
1247] sin & Menailispus.’


1248]

Is andsin domebaid a chai ar Ampiaraus, & rafiarfacht
1249] Melampus: ‘Cid ma cidii, a chumthaig, a trasta?’ ar
1250] Melampus. ‘Truag am sin, a uasail airmidnig, a Melampuis,’
1251] ar Ampiaraus. ‘Doberim-si,’ ar se, ‘aithne ar an én úd
1252] rothuit can ait & can inad d' fagbail, conid mé fein tuitfes
1253] tresin talmain sis ar cathachad mor na Teibi.’ Cid tra acht
1254] ragabastair critheagla mor na faidi & na fisid sin, & rob faiteach
1255] leo fegad na fisi sin, & dochuir an sagart Ampiaraus a edach
1256] uasal idbarta de, & táinic isin sliab co dubach domenmnach,
1257] connach cuiread asa airi cathuchud na Tebhi mar bad
1258] in uair sin nobedh. Et ni deachaid a teach an rig Adraist,
1259] na do comrad re huaislib na hoirechta, acht dofhalcastair hé a
1260] nduama aineolaig anaithnid can fis do duine. Melampus

p.80


1261] immorro dobái fein isin tsleib chedna co cend se lá & se
1262] n-aidchi can labra ré duine.


1263]

Et o nar-labradar na faidi firindi fesa risna Gregaib, rogresistar
1264] Eoip mor, mac Saduirn, cend cumachtach coitchend
1265] caich, gasraid Greg dochum na Teibi do togail, comdais
1266] fasaighthi na feranda & duine & dingnada na Gregi ré leiri
1267] & lanméd tinoil na treinfer sin, cona fagadhais a mna & mic &
1268] mindaine ag nuallguba da n-eis. Is andsin roglanaid & radaingnigid
1269] carpaid craeslethna comora. Ralimaid & rolondraigid
1270] slega suainmeacha sodibraicthi a meirgi & a migne leo-sium.
1271] Raslibaid & roslemnaigid cloidmi aithghera urnochta aco-sam
1272] ré har & ré hoirleach a n-escarad. Raníamaid & ronuaglanaid
1273] cathbarra cruinne cumdachta & luireacha drolmanacha
1274] dubglasa leó. Rochumaid & rochoimsigid inair chaema
1275] cruadchomraig fa chneasaib na curad sin, & tucad leo fedmanda
1276] fillti for bogadaib caema cornectaib. Ralegaid & raluathchumaid
1277] a n-iarrnaigi athcnaiti arathair, a corrana coimremra & a
1278] rastail troma treuairi, comdais airm aithgera urlama a n-agaid
1279] irgaili. Radidnid & radaingnigid a sceith chaidi cathbuadacha
1280] do seitidaib gorma glaedecair tiuga togaidhi tarb.


1281]

Et raergedar uili a n-aenfecht co haenmenmnach na Greig
1282] co hArgas & co teach an righ uasail Adraist con craitheadh
1283] feigi na firmaimindti gair gasraidi Greg ag tinnscedal
1284] tachair re lucht na Teibi coma coma samalta in nuall sin
1285] & tulborb fogragad na cruinni comairdi ac athcumsgugad
1286] don choraid curata .i. Encheladus, da sleibtib sarmora na
1287] Sigili srotaidi.


1288]

Et is amlaid innister co rugad an corad sin fa sleibtib na
1289] Sigili .i. daine mera mileata badar an tus na haimsiri & is
1290] i comairli rochindsed, tocht do togail nime & rigi do gabail.
1291] Et o 'dchualadar na dee sin .i. Ioip & Apaill & na dei

p.82


1292] ar chena, dochuirsedar cath risna coradaib sin & ríu seig
1293] aderthái mic an talman ara truma & ara talmaigeacht.
1294] Ramebaid orra an cath sin, & rochenglaid & rachuibrigid risna
1295] deib iad, & dochuiread fer dib fa shliab Athna. Et is ed
1296] innister an trath chuireas cor no culscal de, conseideann
1297] sruth casracha teinead a taeb ant sleibi, & roceanglaid andsin
1298] Enceladus bá tri sleibtib na Sigili .i. Lilbeus & Pacinnus
1299] & Pilorus, & antan concumscaigenn an coraid sin, crithfograigid
1300] cruinne na firmaiminnti uili, & ba cosmail rissin
1301] nuallgair na nGreg ag iarraid thachair risna Tiabanda.


1302]

Et asa haithli sin rochomerig fer brigach borrfadach soichsinach
1303] sotal sochinelach .i. Capaneus, an sechtmad rí an toicheastail
1304] sin na nGreg, & is é an fer egennais {folio 16a} inniriseach sin nach
1305] denad ni ar deib na ar dainib, & rolabair Capaneus &: ‘Is
1306] dillsiugud & is dimigin duind,’ ar se, ‘a Aimpiarauis, an coimlin
1307] curad cumtaig, atai-si ag urnaidi fhaistine aenduine 'sin
1308] doman. Et mad misi chena,’ ar se, ‘nocha bíu ag urnaidi
1309] ris, uair is and ata mo chumachta comlaind am chlaidim,
1310] & doden-sa faistine daib, a Gregu, muna derna Ampiaraus.’


1311]

Et o raiadsadair na Greig fan ngilla sin, raerig Ampiaraus,
1312] & adubairt: ‘Nocha n-ar glor ogal ainindeach Capaneuis, na
1313] re hegla dodenaind-si faistine daib, acht ar bar ngrád fein.
1314] Acht ata ni chena, a thruaga, ca dasacht & ca drochciall imluaigis
1315] sib? Et ca miscais doberthai daib fein, & dá bar cathraig,
1316] do Argus, antan teigthi d' indsaigi na Tiabanda, & créd ma
1317] tucsabair orm faistine duib? Uair adchondarcus derbairdida
1318] digla dermairi daib, a Gregu, & rothescad snaitheada bar
1319] saegail ag na Parchip iferndaigi.’ Uair tri mna aderar do
1320] beith i n-ifern, & fairchi aderar ríu, & cuigeal gona cuigeallach
1321] aca a triur a chuma shaegail cach duine .i. bean dib ag imarchur
1322] na cuigili .i. Clotha, & bean ag snim ant snaithi .i. Lacesis .i.
1323] in tres ben ic tescad int snaithi Atropus. ‘Et, a thruaga,
1324] a Ghregu,’ ar se, Ampiarus, ‘ca hailleas daib treba na Teibi

p.84


1325] do thuar d' apaigib bar corp arna marbad ar moigib cathrach
1326] Caithim & ge-tu-sa 'ca bar toirmesc?’ ar sé, ‘uair is cinnti co
1327] racham uili and.’


1328]

Et rabai an sagart ana thast Ampiaraus andsin, & dorad
1329] Capaneus athis aridisi ar Ampiaraus, & adubairt: ‘Bi-siu co
1330] timteitheadach isin Greig, & cach aen ara n-urailfi tú eagla
1331] tred t' faistine, & na heist-siu risna stoccaib tendgluaire
1332] Tirrannda. Et dogein-sa fein,’ ar se, ‘faistine da gach aen tia
1333] leam dochum an cathaigthi.’ Et is uime aderar Tirrannda,
1334] risna stoccaib, uair Terenus, ri na Tusceta, brathair Lidh,
1335] cetduine risir-sínnedh sdocc riam ar tuss.


1336]

Et rofograigsed Greig bresmaidm ndermair tresin seiseilbi
1337] sirgloir dorindsead ag comaentaig ré Capaneus, amal fogrugud
1338] doní sruth buinni dian dileann a n-aimsir adfuair earrchaidi
1339] dar fegaib & dar fanglentaib an talman. Et o tainic in adaig,
1340] rascailsead na curaid sin a comrath; & gid sochaidi dochodail,
1341] no cha n-í Argia, ingen Adraist, ben Poilinixeis, rochodail ré
1342] himsnim & ré hudmailli menman a los a fir, uair ní fagad sí
1343] caemthachas na comrath in fhir sin ré snim & ré sirimrad
1344] cíndus dodenad ré brathair ima chuid don rigi & don
1345] fhlaithus.


1346]

Et tainig, derid aidchi, roimpi co teach rigda roard a hathar
1347] & a mac fein & a meic bicc ina laim .i. Tesanndrus,
1348] mac Poilinicseis; & adubairt si ré hathair: ‘Rafider tusa, a
1349] athair ínmain, a Adraist,’ ar si, ‘an toisc 'ma tanag-sa an
1350] tech-sa, Adraist, cen co hindusar dit. Et ni hé Poilinixes
1351] adrubairt rim teacht, acht mad duba & domeanma, {folio 17a}
1352] eccumsunad & etfualang dom-buaidread o thucais-siu mi do
1353] Polinices. Et, a ri, adeir ritsu, tabair furtacht ar in fear
1354] sin, commor catha les do chosnum na Tebi, & a athair inmain,’
1355] ar si, ‘abair in tibrea, uair rocharas-sa in fer sin, & is
1356] coraide ditsiu cungnam les; & ge-tu-sa aniugh ac tendad

p.86


1357] in tachair, is doig leam biait aris acca thairmesc re hecla uilc
1358] daibsi.’ Et asa haithli sin ropoc Adraist a ingin, &: ‘A ingen,’
1359] ar se, ‘ni aiscim ort in geran dani & in n-aicine fuacraid.
1360] Cuir dit t' ecla & dena do cheli do chomdidnad, uair atamaid-ne
1361] ac fur in chatha sin & is cinti a chur.’ Et o thainic in
1362] maten re crichaib in chomraid sin, roerig Adraist.