Corpus of Electronic Texts Edition
Togail na Tebe (Author: Unknown)

List of witnesses


p.xxii

Gaelic Note

{folio 253a}

Mile bliadan & CCCC & secht mbliadna agus cethra XX aís in Tigerna in bliadain roscribad in lebar-sa, & isin bliadain cetna testa O Raighilligh .i. Toirrdhelbach mac Seain, & isin bliadain cetna domarbad clann I Ruairc .i. Tigernan & Brian ruadh .i. Tigernan domarbad le clainn Mic Diarmada & le Muinntir-Eolais a fell & Brian domarbad le mac I Ruairc .i. re hEogan mac Feidhlimthe mic Donnchaid mic Tigernain; & isin bliadain cetna domarbad Tigernan dubh mac Donnchaidh caech Tigernain le O Domnaill .i. re hAedh ruadh O Domnaill, & isin bliadain cetna dobrissedh {folio 253b} caislen I Ruairc .i. Feidlimid mac Donnchaid le O Domnaill & le clainn I Ruairc & isin bliadain cetna dogabudh Cloch Locha-huachtair le slicht Domnaill Bain I Raighilligh & me fein Diarmaid. Ba Cathal mac Parthalain doscribh in leabar-sa .i. mac Fingin mic Foirithe mic Fergail mic Partalain & a tigh Fingin doscribad leth in lebair-sa .i. a Doire Casain & a tigh mic Briain Tellaigh-Echach dos-cribad in cuid ele de .i. a tigh arosa .i. Feidhlimid mac Taidhg oig mic Taidhg moir & ar iniss Eocinain docrichnuighedh e i nDardain re feil Catrina; & G is litir Domnaig annsa bliadain sin, & Sis nuimiroir, & feile mic Tomais mic Ferguis mic Tomais udh Tigerna a Tellach-Echach re linn in lebair-sia dosgribad; & isin n-aimsir cetna dobi da espoc a n-espoicdeachd Cille Moire .i. Cormac mac in espuic Megsamradhain, & Tomás mac Ainntriu Meg-bradaigh, & gach fer dibh 'ga rada gur-b e fen is espoc and; & Felim mac Donnchaidh mic Tigernain is O Ruairc re linn na n-espoc sin, & Sean mac Toirrdelbhaigh mic Seain is O Raighilligh annsan aimsir sin; & annsa bliadain chetna domarbad O Mailshechlainn .i. Laighnech O Mailshechlainn le Conn mac Airt I Mailsheachlainn. Et bennchd De ar anmain innti dosgribh in lebar-sa. Et dobi cogad idir Magsamradhain & O Raigailligh .i. Sean O Raighilligh isin bliadain cetna sin, & cogad ele idir slicht Taidhg I Ruairc & rla.