Corpus of Electronic Texts Edition
The Gaelic Maundeville (Author: John Maundeville)
paragraph 119
Ocus creiditt co maith oibrechad Dé do beith cóir & a shosceoil & cach ní da n-dubairt do beith ina fírinne, & a mírbuili, & creiditt Muire do beith ina h-óigh ría n-geinemain Meic Dé & ina díaidh, & is ullamh íad dochum inntaighthi docum ar creidimne,
p.230
& do chluinitt senmóir & ráidti na fáidhed & aderaitt co cuirfidhter dliged na n-Idhal & dliged Macametus ar cúl, & co mairfed dliged na cristaided co sír & creiditt síatt an Día uile cumachtach do cruthaig neam & talam & gach uile ní, & nach deutur aenní cóir na h-écmais & co fhuighbe cach aen mur thuillfes lá na brethe do maith nó dh'ulc & creiditt curab fírindech gach ní da ndubairt trit na fáidhib doib{folio 61b2}15.