‘An mberum linn ni do clochaib na tragha?’ ar siat.
‘Is ferr a cedughudh,’ ar in sruith.
Cetuighidh in gilla dorisi.
‘Is ferr di a chetugud, ’ ar in sruith bui isin eaclais. ‘Act cena,’ ar se, ‘bidh bronach anti nos-bera & bidh bronach fos inti nach bera.’.
Berid araili dib oen clach, araili da cloich, araili tri clocha. O robo maitean arnamarach ro ibhsit deoga do uisce na hindsi, & focert a suan cotalta iat on trath co aroili. Rofucsat uili a clocha iar n-erghi asa codlud, cloch ann ba gloine, cloch aili ba hairget, cloch aili ba hor. Ba bronach immorro inti tuc ni lais dib, & ba bronach inti nach tuc .i. inti tuc ni lais ba bronach he ara laghat tuc lais, co rocomailled briathra in tsenorach amluid.