Corpus of Electronic Texts Edition
The Voyage of the Hui Corra (Author: Unknown)

section 53

Celeabrait do iarsin & roraimhit as co rancatar inis ele. Daine marba a rann di. Daine beo a rann eli. Focertitis ualla mora & grithghairi adbulmhora intan nothictis tonna ruadhlasrach mora in mara tentidhi tairrsibh. Ba mor & ba hadhbhul in phian ir-rabatar, & bai drong dibh & ba cosa iaruinn bai futhuib. Roráimhset as iarsin co facatar na leaca troma tentidhi , & sluagh mor forro ga loscud, & bera derga tentidhi tritha. Focertitis ualla troma mora. Batar sumh oca fiafraighid dib cia ret iat. ‘Leac do leacuibh ifirn so,’ ar siat, ‘& anmanna sinne nár' chomhall ar mbreath aithrighe 'san saoghal, & abraidhsi fri gach nduine a n-imdhiten ar in leic si, uair gibe tic sunna ni tiagait as co brath.’