Atbath in crosan acu iarsin, & batar cutoirsech dobronach de sin. Amal robatar ann co bfacadar in t-en beg ar bord in churaig, conud ann asbert an t-en: ‘Ar Dhia ribh, a daine, innisidh dam adhbhur bur toirsi.’
‘Crosan bec bui againn ag oirfited duin, & atbath o chianuib isin curuch, & is e sin adhbur ar toirsi.’
‘Is misi bur crosan,’ ar in t-en, ‘ocus na biti-si bronach ni is mo, oir ragatsa fhor nemh anosa.’
Ceilibraid doibh iarsin.